ކަރަންޓުގެ ޙާލަތު ރަނގަޅުކުރުމަށް ޓަކައި ހއ. ކެލައަށް އައު ޖެރޭޓަރެއް ފޮނުވުމުގެ މަސައްކަތް ފެނަކަ ކޯޕަރޭޝަނުން ކުރިއަށް ގެންދިޔުމަކީ ކެލާގެ ކަރަންޓްގެ ޚިދުމަތަށް ހެޔޮ ބަދަލެއް އަންނާނެ ކަމެކެވެ.
ފެނަކަ ކޯޕަރޭޝަނުން ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވެފައިވާ ގޮތުގައި ހއ. ކެލައަށް 400 ކިލޯ ވޯޓްގެ ޖެންސެޓެއް ފޮނުވުމުގެ މަސައްކަތް އެ ކޯޕަރޭޝަނުން އަންނަނީ ކުރައްވަމުންނެވެ. އެ ޖަނަނޭޓަރ ކެލައަށް ލިބި އިންސްޓޯލްކޮށް އޮޕަރޭޓްކުރުމުގެ މަސައްކަތްތައް ފެށިގެން ދިޔުމަކީ އޭގެ ސަބަބުން ކަރަންޓުގެ ޙާލަތު މިހާރަށް ވުރެ އެތައް ތަނެއް ރަނގަޅުވެގެން ދާނެ ކަމެކެވެ. ފެނަކައިން ހާމަކުރައްވާ ގޮތުގައި މިއީ ފެނަކައިން ދެމެހެއްޓެނިވި ގޮތެއްގައި ކަރަންޓުގެ ޚިދުމަތް ދިނުމަށް ކުރެވެމުންދާ މަސައްކަތްތަކުގެ ތެރެއިން ކުރިއަށް ގެންދާ މަސައްކަތެކެވެ.
ސްޓޭޓް އިލެކްޓްރިކް ކޮމްޕެނީ ލިމިޓެޑާއި، ފެނަކަ ކޯޕަރޭޝަން ލިމިޓެޑުން ދިވެހިރާއްޖެއަށް ކަރަންޓުގެ ޚިދުމަތް ފޯރުކޮށް ދެއްވަމުން އަންނަ އިރު، 157 ރަށަކަށް ކަރަންޓުގެ ޚިދުމަތް ފޯރުކޮށް ދެއްވަމުން އަންނަނީ ފެނަކަ ކޯޕަރޭޝަން ލިމިޓެޑުންނެވެ. ރައީސް ޑޮކްޓަރ މުޙައްމަދު މުޢިއްޒުގެ ސަރުކާރަށް ބަދަލުވި ފަހުން ފެނަކަ ކޯޕަރޭޝަން ލިމިޓެޑުން ދެމުން އަންނަ ކަރަންޓު ޚިދުމަތުގެ ފެންވަރު އިތުރަށް ރަނގަޅުކުރުމަށް ޓަކައި ގިނަގުނަ މަސައްކަތްތަކެއް އެ ކުންފުނިން އަންނަނީ ކުރައްވަމުންނެވެ. ޚާއްޞަ ގޮތެއްގައި ރަށްރަށުގެ ކަރަންޓު ވިއުގަ އަދުގެ ޓެކްނޮލޮޖީއާ އެއް ގޮތަށް އަޕްގްރޭޑުކުރުމާއި، އައު އިންޖީނުތައް ރަށްރަށަށް ހޯދުމުގެ މަސައްކަތް ވަރަށް ބާރަށް ކުރައްވަމުން އަންނަކަން ފާހަގަކެރެވެއެވެ.
އުންމީދު ކުރެވެނީ ޚިދުމަތްތައް ޒަމާނީކުރުމުގެ ގޮތުން އެ ކޯޕަރޭޝަނުން ކުރައްވާ މަސައްކަތްތަކުގެ ތެރޭން ކެލާގެ ކަރަންޓު ޚިދުމަތް އިތުރަށް ތަރައްޤީވެ ރައްޔިތުންނަށް އެ ހިއްފަސޭހަކަން ކައިރި މުސްތަޤުބަލެއްގައި ލިބިގެންދާނެ ކަމަށެވެ.
