މިހާރު ހިނގަމުންދާ ގޯލްޑަން ފުޓްސަލް ޓޯނަމަންޓްގެ ހއ.ގެ ފައިނަލަށްދާ ޓީމުތައް ކަނޑައެޅުމަށް ކުޅޭ، ފޯރި ގަދަ ސެމީ ފައިނަލް މެޗުތަކުގެ ކުޅުން މިރޭ އޮންނާނެއެވެ.
އެއް މެޗުގައި ބައްދަލުކުރާނީ އޭ ގުރޫޕުގެ 1 ވަނަ ޓީމުގެ ގޮތުގައި ސެމީން ޖާގަ ހޯދި ފިއްލަދޫއާއި، ބީ ގުރޫޕުން ދެ ވަނަ ޓީމުގެ ގޮތުގައި ސެމީއަށް ދަތުރުކުރި މާރަންދޫއެވެ. ފިއްލަދޫ ސެމީއަށް ދަތުރުކުރީ ގުރޫޕު ސްޓޭޖުގައި ކުޅުނު ހުރިހާ މެޗެއް ކާމިޔާބުކޮށް 12 ޕޮއިންޓް ހޯދައިގެންނެވެ. މާރަންދޫ ސެމީއަށް އައީ ގުރޫޕު ސްޓޭޖުގައި ކުޅުނު 4 މެޗުގެ ތެރެއިން 2 މެޗުން މޮޅުވެ، އެއް މެޗު ޑްރޯކޮށް އަނެއް މެޗުން ބަލިވެ 7 ޕޮއިންޓާއެކުގައެވެ.
ހއ. ގެ ސެމީ ފައިނަލް އަނެއް މެޗުގައި ބައްދަލުކުރާނީ ބީ ގުރޫޕުން 1 ވަނަ ޓީމުގެ ގޮތުގައި ސެމީން ޖާގަ ހޯދި މުރައިދޫއާއި، އޭ ގުރޫޕުން ދެ ވަނަ ޓީމުގެ ގޮތުގައި ސެމީއަށް ދަތުރުކުރީ ކެލައެވެ. މުރައިދޫ ސެމީން ޖާގަ ހޯދީ ގުރޫޕު ސްޓޭޖުގައި ކުޅުނު ހުރިހާ މެޗެއް ކާމިޔާބުކޮށް 12 ޕޮއިންޓް ހޯދައިގެންނެވެ. ކެލާ ސެމީއަށް އައީ ގުރޫޕު ސްޓޭޖުގައި ކުޅުނު 4 މެޗުގެ ތެރެއިން 2 މެޗުން މޮޅުވެ، އެއް މެޗު ޑްރޯކޮށް އަނެއް މެޗުން ބަލިވެ 7 ޕޮއިންޓާއެކުގައެވެ.
މި 4 ޓީމުން ކުރެ، ކޮންމެ ޓީމަކީ ވެސް އެއް ޓީމު އަނެއް ޓީމަށް ދޫނުކުރާވަރުގެ މޮޅު ކުޅުންތެރިންތަކެއް އެކުލެވޭ ޓީމުތަކެކެވެ. މޮޅުވުން ގިނަ ފަހަރު ގުޅިފައި އޮންނަނީ، އެ މެޗަކު ކުޅުންތެރިންނަށް ދެއްކޭ ހިތްވަރެއްގެ މައްޗަށެވެ.
މިރޭ 10.00ގައި ހުޅުމާލޭ ރެހެންދި ފުޓްސަލް ދަނޑުގައި، އެއް ގަޑިއެއްގައި ކުޅޭ ސެމީ ފައިނަލަށް ފިއްލަދޫ، މާރަންދޫ، މުރައިދޫ އަދި ކެލާއިން އާދެވެން ތިބި އެންމެން އައިސް ކުޅުންތެރިންނަށް ހިތްވަރުދިނުމަކީ މެޗުތަކުގެ ފޯރި އިތުރަށް ގަދަވެގެންދާނެ ކަމެކެވެ. ސަޕޯޓަރުންނަކީ ޓީމުގެ 6 ވަނަ ކުޅުންތެރއާއެވެ.
