އެންމެ ފަހުގެ ޗެންޕިއަން އިހަވަންދޫއާއި، މުބާރާތް ބާއްވާ ރަށް ކަމުގައިވާ އުތީމާއެކު ކުޅުނު ޗެރިޓީ މެޗުން ސްޕޯރޓްސް ކޮމިޝަނަރ މުޙައްމަދު ޠަލާލު ފައްޓަވައިދެއްވި، ތިލައުތުރު ފުޓްސަލް މުބާރާތް 2025ގައި ކެލާ، އައު ކޯޗަކާއެކު މިރޭ ބާރަށާ ބައްދަލުކުރާނެއެވެ.
ކެލާ، ކަގި އާދަމް ޝަރީފުގެ ކޯޗުކަމުގެ ދަށުން ކެލާ ޓީމު ކުޅޭ ފުރަތަމަ މެޗުގައި، މިރޭ 9.00ގައި ބާރަށާ ބައްދަލުކުރާ ކެލާ ޓީމުގައި ތަޖުރިބާކާރު ގޯލް ކީޕަރު ޢަބްދުﷲ ޒިމާމުގެ އިތުރުން އެތައް ކުޅުންތެރިންނެއް ހިމެނެއެވެ. އަދި މުޅިން އަލަށް މި ފަދަ މުބާރާތެއްގައި ވާދަކުރާ ގިނަ ކުޅުންތެރިން ތަކެއް މި ޓީމުގައި ހިމެނެއެވެ.
ތިލައުތުރު ފުޓްސަލް މުބާރާތުގައި ކެލާ ހިމެނިފައި ވަނީ ގުރޫޕު ބީ ގައެވެ. މި ގުރޫޕުގައި ކެލާގެ އިތުރުން ހިމެނެނީ ބާރަށާއި، ދިއްދޫއާއި އަދި މުރައިދޫއެވެ.
ޖުމްލަ 9 ރަށަކުން ވާދަކުރާ މި މުބާރާތް ފެށުމުގެ ގޮތުން ކުޅުނު ޗެރިޓީ މެޗު ކާމިޔާބުކުރީ އެންމެ ފަހުގެ ޗެންޕިއަން އިހަވަންދޫއިންނެވެ. މި މެޗު އިހަވަންދޫއިން ކާމިޔާބުކުރީ 1-1އިން އެއްވަރުވެ ޖެހި ޕެނަލްޓީން ކުރިހޯދާއިގެންނެވެ.
ތިލައުތުރު ފުޓްސަލް މުބާރާތަކީ ހއ. އަތޮޅު ކައުންސިލުން އިންތިޒާމުކޮށްގެން ބާއްވަމުން އަންނަ މުބާރާތެކެވެ. މި އަހަރު މި މުބާރާތް ބާއްވަނީ އުތީމުގައެވެ. މިރޭގެ މެޗަށް ކެލާ ނުކުންނަ އިރު، މިއަދު ހަވީރު ކުޅުނު މި ގުރޫޕުގެ ފުރަތަމަ މެޗު 2 ލަނޑު 1 ލަނޑުން ކާމިޔާބުކޮށްފައި ވަނީ ދިއްދޫއެވެ.
ތިލައުތުރު ފުޓްސަލް މުބާރާތުގައި ވާދަކުރާ ކެލާ ޓީމަށް ތިލައުތުރު ނޫހުގެ ފަރާތުން ކާމިޔާބަށް އެދެމެވެ.
