މިހާރު ހިނގަމުންދާ ގޯލްޑަން ފުޓްސަލް ޓޯނަމަންޓްގައި މިއަދު ހަވީރު ކުޅޭ ހއ.ގެ އޭ ގުރޫޕު މެޗުތަކުގެ ފޯރި ކުޑަވެދާނެ ކަމަށް ބެލެވުނަސް، ގުރޫޕް ބީގަ ކުޅޭ މި މުބާރާތުގެ ހއ.ގެ އެންމެ ފަހުގެ ޗެމްޕިއަން ވަށަފަރާއި، މާރަންދޫ ވެސް ގަދަ ހިފުމަކަށް މިއަދު ހަވީރު ނުކުންނާނެއެވެ.
ޗެމްޕިއަން ވަށަފަށް ނުކުންނަނީ މިހާރުވެސް ބީ ގުރޫޕުން ސެމީގެ ޖާގަ ކަށަވަރުކޮށްފައިވާ މުރައިދޫއާ ދެ ކޮޅަށެވެ. މާރަންދޫ ނުކުންނަނީ ގުރޫޕުގެ ފުލުގައި އޮތް އުތީމާ ދެ ކޮޅަށެވެ. މި ދެ މެޗަށް ބަލާ އިރު ވަށަފަރަށް ސެމީގެ ޖާގައެއް ލިބެން އޮތީ މުރައިދޫ އަތުން ބަލިނުވެ ނިންމާލެވިގެންނެވެ. ހަމަމިފަދައިން މާރަންދުއަށް ސެމީގެ ޖާގައެއް ލިބުނަސް ލިބެން އޮތީ އުތީމުގެ މައްޗަށް ކުރި ހޯދައިގެންނެވެ. މިއަދުގެ މެޗަށް ނުކުންނަ އިރު މުރައިދޫއަށް މިހާރު ވެސް ވަނީ 9 ޕޮއިންޓް ލިބިފައެވެ. ވަށަފަރަށް ލިބިފައި ވަނީ 6 ޕޮއިންޓެވެ. މާރަންދޫއަށް ލިބިފައި ވަނީ 4 ޕޮއިންޓެވެ. އެހެންކަމުން ވަށަފަރާއި، މާރަންދޫއަށް ވެސް މި މެޗުގެ ނަތީޖައިން ސެމީއަށް ދިޔުމުގެ ފުރުޞަތު ތަނަވަސްކޮށް އެބަ އޮތެވެ. ނަމަވެސް ފުރުޞަތު ބޮޑީ ވަށަފަރަށެވެ. އެއީ ޑްރޯއަކުން ވެސް ފުއްދާލެވޭތީއެވެ. ގްރޫޕް ބީގައި ކުޅެވޭ މި ދެ މެޗުގެ ކުޅުން ވެސް އޮންނާނީ މިއަދު ހަވީރު 5.00 ގައެވެ.
ހއ.ގެ އޭ ގުރޫޕުގެ ދެ މެޗެއް ވެސް މިއަދު ހަވީރު 4.00ގައި ކުޅުމަށް ތާވަލުކުރެވިފައި ވެއެވެ. އެއް މެޗުގައި ބައްދަލުކުރާނީ ގުރޫޕުގެ 1 ވަނާގައި ސެމީން ޖާގަ ހޯދާފައިވާ ފިއްލަދޫއާއި، ހޯރަފުށްޓެވެ. އަނެއް މެޗުގައި ބައްދަލުކުރާނީ ތުރާކުނާއި، ބާރަށެވެ. މިއަދުގެ މެޗުތައް ކުޅޭއިރު ވެސް މި ގުރޫޕުން ސެމީގެ ޖާގަ ލިބޭ ޓީމުތަކާއި. އެ ޓީމުތަކުގެ ތަރުތީބު ވެސް ކަނޑައެޅިފައިވާކަން ފާހަގަކޮށްލަމެވެ. މި ގުރޫޕުން ސެމީގެ ޖާގަކަށަވަރުކޮށްފައި ވަނީ 1 ވަނަ ޓީމުގެ ގޮތުގައި ފިއްލަދޫއެވެ. ދެ ވަނަ ޓީމުގެ ގޮތުގައި ކެލައެވެ.
މި 4 މެޗުގައި ކުޅޭ ޓީމުތަކުގެ ކުޅުންތެރިންނަށް ހިތްވަރު ދިނުމަށް ކުޅިވަރަށް ލޯބިކުރާ ހއ.ގެ ގިނަ ބަޔަކު ދަނޑުދޮށަށް ނުކުތުމަކީ ކުޅުންތެރިނަށް ލިބޭނެ އިތުރު ޖޯޝެއްކަމުގައި ދަންނަވަމެވެ. ޚާއްޞަކޮށް ވަށަފަރާއި، މާރަންދޫގެ ސަޕޯޓަރުން އިތުރުވާނެ ކަމަށް އުންމީދުކުރަމެވެ.
