ކެލާ ރަށްވެހި އާސާރު ތަރައްޤީކުރާނީ ދިވެހީންގެ އަމިއްލަވަންތަކަން ނުގެއްލޭ ގޮތަށް: ވަޒީރު އާދަމް ނަޞީރު އިބްރާހީމް
ކެލާ ރަށްވެހި އާސާރު ތަރައްޤީކުރާނީ ދިވެހީންގެ އަމިއްލަވަންތަކަން ނުގެއްލޭ ގޮތަށް ކަމަށް ދިވެހި ބަހާއި ސަގާފަތާއި ތަރިކައާއި ބެހޭ ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ. ވަޒީރު އާދަމް ނަޞީރު އިބްރާހީމް، މިހެން ވިދާޅުވީ ރައްޔިތުންގެ މަޖިލީހުގައި ކެލާ ދާއިރާގެ ޢިއްޒަތްތެރި މެންބަރު ޢަބްދުﷲ ޝަރީފު، ވަޒީރު އާދަމް ނަޞީރާ ކުރެއްވި ސުވާލަކަށް ޖަވާބު ދެއްވަމުންނެވެ.
އަކަ އިންވެސްޓްމެންޓާ ޙަވާލުކޮށް، ކެލާ ރަށްވެހި އާސާރު ތަރައްޤީކުރުމުގެ މަސައްކަތް ރައީސް އިބްރާހީމް މުޙައްމަދު ޞާލިޙުގެ ސަރުކާރުން 2021 ގައި ފައްޓާފައި ވިޔަސް، މިޔުޒިއަމެއްގެ ގޮތުގައި ކެލާ ލިލީ ހައުސް މިހާތަނަށް އައި އިރު ބޭނުންކުރަން ފެށިފައެއް ނުވެއެވެ.
ވަޒީރު އާދަމް ނަޞީރު އިއްޔެ މަޖިލީހުގައި، ކެލާ ރަށްވެހި އާސާރުގެ ވާހަކަފުޅު ދެއްކެވި އިރު، ރޭގެ ވަގުތެއްގައި އެ ވުޒާރާގެ ޓީމެއް ކެލާއަށް ފޮނުވާ، އެ ކަމުގެ ޢަމަލީ މަސައްކަތް ފެށުމަށް ކުރަންޖެހޭ ކަންތައްތައް ދެނެގަތުމުގެ މަސައްކަތް ފެށިފައިވާކަން ތިލައުތުރު ނޫހަށް ވަނީ މަޢުލޫމާތު ލިބިފައެވެ.
އެމްޕީ ޢަބްދުﷲ ޝަރީފު އިއްޔެ ވަޒީރާ ކުރެއްވި ސުވާލަށް ޖަވާބުދެއްވާ ވަޒީރު ދެއްކެވި ވާހަކަފުޅުގައި ކެލާ ރަށްވެހި އާސާރު ތަރައްޤީކުރަނީ މި ސަރުކާރުގެ ގެ ސިޔާސަތުގެ ތެރޭގައި ހިމެނޭ ރަށްވެހި ދާރުލް އާސާރު، ރަށްވެހި
އާސާރުތައް ތަރައްޤީކުރުމުގެ މަފްހޫމުގެ ތެރެއިން ކަމަށް ވިދާޅުވިއެވެ. އަދި އެ ކަން ކުރަނީ މިހާރު ސޮއިކުރެވިފައިވާ ގޮތަށް އާރުޑިސީއާ ޙަވާލުކޮށްގެން ކަމަށް ވެސް ވިދާޅުވިއެވެ.
ކެލާ ރަށްވެހި އާސާރު ތަރައްޤީކުރުމަށް ރޯޑް ޑިވޮލޮޕްމެންޓް ކޯޕަރޭޝަން (އާރުޑީސީ)އާ ހަވާލުކޮށްފައި ވަނީ މި އަހަރުގެ މާރިޗު މަހުގެ 26 ގައެވެ. ކެލާ ރަށްވެހި އާސާރު ތަރައްޤީކުރާ ލިލީ ހައުސްއަކީ ދިވެހީންގެ މަސައްކަތްތެރިކަމާއި، ފަންނުވެރިކަމާއި އަދި ހުނަރުވެރިކަން ދައްކައިދޭ ލާމަސީލު ބިނާއެއް ކަމުގައިވާ ކެލާ ލިލީ ހައުސްގައެވެ.
