މައްސަރުތަކުގެ ތެރެއިން ރަމަޟާންމަސް އެތައް ގޮތަކުން މާތްﷲ މާތްކުރައްވައި މަތިވެރި ކުރެއްވިކަމަށް 2026 ވަނަ އަހަރުގެ ފެބުރުވަރީ މަހުގެ 20 ވަނަ ދުވަހުގެ ހުކުރު ޚުޠުބާގައި ގޮވާލައްވައިފިއެވެ. ”ތަޤުވާވެރިވުމާއި ތައުބާގެ މައްސަރު!” މި މަޢުޟޫއަށް ލިޔެފައިވާ ޚުޠުބާގައި ރަމަޟާންމަހުގައި ކީރިތި ޤުރްއާން ބާވައިލެއްވުމާއި ޚާއްޞަ އަޅުކަމެއް އެމަހުގައި ފަރުޟުކުރެއްވުމުގެ އިތުރުން އެ މައްސަރުގައި ކުރާ ހެޔޮ ކަންކަމަށް މަތިވެރި ޖަޒާދެއްވާނެކަން ބަޔާންކުރައްވައިފައި ވެއެވެ.
އާދަކާދައިގެމަތިން ޚުޠުބާ ފައްޓަވާފައިވަނީ އެންމެހައި ޙަމްދު ޘަނާ ތަޢުރީފު ޙާއްޤުވެގެންވަނީ މާތްﷲއަށް ކަމާއި އެކަލާނގެ ރަސޫލާއަށް ޞަލަވާތާއި ސަލާމް ލެއްވުން އެދި ދުޢާކުރަމުންނެވެ. އަދި އެ ޞަލަވާތާއި ސަލާމުގައި އެ މާތް ރަސޫލާގެ އާލު އަޞްޙާބުންނާއި ހެޔޮގޮތުގައި ތަބަޢަވީ އެންމެން ޝާމިލް ކޮށްފައި ވެއެވެ. ހަމައެހެންމެ މާތްﷲ އަށް ތަޤުވާގެރިވުމަށާއި މާތްﷲ ފިޔަވާ ޙައްޤުވެގެން އަޅުކަންކުރެވޭ އެހެންފަތާރެއް ނުވާކަމަށާއި އެކަލާނގެއަށް ޝަރީކުނުކުރުމަށް ހުރިހާ މުސްލިމުންނަށް ހަނދާންކޮށްދެއްވާފައި ވެއެވެ.
މި މައްސަރުގައި ކުރެވިފައިވާ ފާފަތަކާއެމު ދެރަވެ ހިތާމަކުރުމާއެކު އެކަމަށް އަރައިނުގަތުމަށް ޢަޒުމް ކަނޑައަޅައި އިޚްލާޞްތެރިކަމާއެކު ތައުބާވުމަށް މާތްﷲ ގެ ޙަޟުރަތުގައި ދެންނެވުމަށް ހުކުރު ޚުޠުބާގައި ގޮވާލައްވާފައި އެވެވެ. އަދި ތައުބާވުމަކީ ތަޤުވާވެރިކަމުގެ މަތީގައި މީހާ ދެމިހުރުމަށް މަގުފަހިކޮށްދޭ ކަމެއްކަމާއި ކީރިތި ރަސޫލާގެ މަތިވެރި ނަމޫނާއިން މިކަމުގެ ނަމޫނާ ލިބިގަތުމަށް އިރުޝާދު ދެއްވާފައި ވެއެވެ. މިކަމާ ގުޅޭ ދަލީލުތައް ޤުރްއާނާއި ރަސޫލާގެ ޙަދީޘްތަކުން ގެންނަވައިފައި ވެއެވެ.
ރަމަޟާންމަހަކީ ސުވަރުގޭގެ ދޮރުކޮޅުތައް ހުޅުވިފައިވާ އަދި ނަރަކައިގެ ދޮރުތައް ބަންދުވެފައިވާ މައްސަރެކެވެ. އަދި މާތް ﷲ މި މައްސަރުގެ ކޮންމެ ރެއެއްގައި ބަޔަކު ނަރަކައިން މިންޖުކުރައްވާނެކަމަށް އަންގަވާފައި ވެއެވެ. މާތް ނަބިއްޔާ ރަމަޟާންމަހުގައި ރޭ އަޅުކަން ކުރެއްވުން ގިނަކުރެއްވިއެވެ. ކީރިތި ރަސޫލާ އެކަންކަން ކުރެއްވުމާއެކު އެކަލޭގެފާނުގެ އަހުލުބައިތުންވެސް އެކަންކަން ކުރުމަށް ބާރުއެޅުއްވިއެވެ.
”ރަމަޟާންމަހަކީ ހެޔޮކަމާއި ބަރަކާތާއި ފާފަފުއްސެވުމުގެ މޫސުމެކެވެ” މުސްލިމް މުޖުތަޢުތަކުގައި މިކަން ދަމެހެއްޓުމަށް ގަދައަޅާ މަސައްކަތްކުރަންޖެހެއެވެ. މީހުން ދިރިއުޅޭ ރަށްރަށާއި ރިސޯޓްތަކުގައި ފަތުރުވެރިންނަށް ކެއިންބުއިމުގެ ޚިދުމަތްތައް ފާޅުކަން ބޮޑުގޮތެއްގައި ދިނުމަކީ ހުއްދަވާނޭ ކަމެއްނޫނެވެ. އެކަމަށް ޚާއްޞަ އިންތިޒާމުތަކެއް ހަމަޖައްސައިގެން ކުރިޔަށް ގެންދެވިދާނެއެވެ.
ޚުޠުބާ ނިންމަވާލައްވާފައިވަނީ މި މަތިވެރި މައްސަރުގެ ބަރަކާތްލިބޭ ބަޔަކުކަމުގައި އަޅަމެން ލެއްވުން އެދި ދުޢާކުރުމާއެކު މި ޤައުމަށާއި ޤައުމުގެ ކަންކަމަށް ރަނގަޅުގޮތްވުމަށް އެދި ދުޢާކުރަމުންނެވެ. ޤައުމުގެ ކަންކަން އިސްލާމްދީނާއެއްގޮތަށް ގެންދިއުމަށް މަސައްކަތްކުރައްވާ ވެރީންނަށް ހެޔޮގޮތްވުމަށް އެދެމުންނެވެ. ބަލިމީހުންނަށް ޝިފާދެއްވާ ފުރިހަމަ ޞިއްޙަތާއި ޢާފިޔަތުގެ ނިޢުމަތް މިންވަރު ކުރެއްވުމަށް އެދެމުންނެވެ.
