ހއ. އަތޮޅު ތަޢުލީމީ މަރުކަޒުގެ ހެޑްމާސްޓަރުކަން ފުރަތަމަ ކުރެއްވި ހއ. ދިއްދޫ، ތިލަދޫ މުޙައްމަދު ނަޞީރު ޔޫސުފު މިއަދު ހެނދުނުގެ ވަގުތެއްގައި އަވަހާރަވެއްޖެއެވެ.
ހއ. އަތޮޅަށް ގިނަގުނަ ޚިދުމަތްތަކެއް ނަޞީރު ވަނީ ކުރައްވާފައެވެ. ހއ. އަތޮޅު ތަޢުލީމީ މަރުކަޒުގެ ހެޑްމާސްޓަރުކަމުގެ އިތުރުން ހއ. އަތޮޅު އޮފީހުގެ ސެކްރެޓަރީކަމާއި، ޑިރެކްޓަރުކަމާއި، އަތޮޅުވެރިޔާގެ އެހީތެރިޔާކަމާއި، މުއާވިންކަން ވެސް ނަޞީރު ވަނީ ކުރައްވާފައެވެ. ސަރުކާރުގެ ޚިދުމަތުން ނަޞީރު ރިޓެއާކުރެއްވި އިރު ހުންނެވީ ހއ. އަތޮޅު ކައުންސިލްގެ އެގްޒެކެޓިވް ޑިރެކްޓަރުކަމުގެ މަޤާމުގައެވެ.
40 އަހަރަށް ވުރެ ގިނަ ދުވަހު ދިވެހި ދައުލަތަށް ޚިދުމަތްކުރެއްވި ނަޞީރަކީ، ޢިލްމީ ގޮތުން ޤާބިލު އަދި ނުހަނު ހިންގުންތެރި ވެރިއެކެވެ.
ނަޞީރު އަވަހާރަވީ ހުޅުމާލޭ ހޮސްޕިޓަލުގައެވެ. ޖަނާޒާ އޮތީ މިރޭ ޢިޝާނަމާދަށް ފަހު، ހުޅުމާލޭ ސަހަރާގައެވެ. ނަޞީރު އަވަހާރަވުމަކީ މުޅި ހއ. އަތޮޅަށް ލިބުނު ފުންހިތާމައެކެވެ.
