ޒޯން 1ގެ ފައިނަލުގައި ދެ ޗެމްޕިއަނުން ވާދަކުރާ ގޮތަށް ގުރޫޕުގެ މެޗުތައް ރޭ ނިމިއްޖެއެވެ. މި ގޮތަށް ނިމުނީ ދެ އަތޮޅު ރަނަރއަޕުން ކަމުގައިވާ ހއ. ކެލާއާއި، ހދ. ނޮޅިވަރަންފަރު ރޭ ބައްދަލުކުރި މެޗު 1-1އިން އެއްވަރުވުމުގެ ސަބަބުންނެވެ.
ކެލާ، ނޮޅިވަރަންފަރު މެޗުގައި ކެލާ ޓީމުން ލަނޑުޖެހީ ގޯލް ކީޕަރު ޢަބްދުﷲ ޒިމާމެވެ. ނޮޅިވަރަންފަރުން ލަނޑުޖެހީ އަޙްމަދު ސިޒާނެވެ. މި މެޗުގެ މޮޅު ކުޅުންތެރިއަކަށް ހޮވުނީ ކެލާ ޓީމުގެ ކީޕަރު ޖަރޒީ ނަންބަރު 20 ޢަބްދުﷲ ޒިމާމެވެ. ރޭގެ މެޗުން މޮޅުވެގެން ފައިނަލަށް ދިޔުމުގެ ފުރުޞަތު ކެލައަށް ލިބެން ނެތަސް، އެ ފުރުޞަތު ލިބެން އޮތް ނޮޅިވަރަންފަރަށް ފައިނަލުގެ ޖާގަ ގެއްލުނީ މި މެޗު އެއްވަރުވުމުގެ ސަބަބުންނެވެ.
މި މެޗުން ނޮޅިވަރަންފަރު ބަލިވުމުން، ނާވައިދޫ އަތްދަށުވި ހއ. އަތޮޅު ޗެމްޕިއަން މާރަންދޫއަށް ޕޮއިންޓެއްގެ ތަފާތުން ހދ. އަތޮޅު ޗެމްޕިއަން ނާވައިދޫއާއެކު ޒޯނުގެ ފައިނަލް މެޗުގައި ވާދަކުރުމުގެ ފުރުޞަތު ލިބުނީއެވެ.
ނާވައިދޫއާއި، މާރަންދޫ ކުޅުނު މެޗު 3-1އިން ކާމިޔާބުކުރީ ނާވައިދޫއެވެ. މި މެޗުގައި ނާވައިދޫން ލަނޑުޖެހީ ޢަބްދުﷲ ވިސާމް 2 ލަނޑު، ޙުމައިދު ޙުސައިން 1 ލަނޑެވެ. މާރަންދޫއިން ޖެހި ހަމައެކަނި ލަނޑު ކާމިޔާބުކުރީ ލޫޠު ޙުސައިނެވެ. މި މެޗުގެ މޮޅު ކުޅުންތެރިއަކަށް ހޮވުނީ ނާވައިދޫއަށް 2 ލަނޑު ޖަހައިދިން ޢަބްދުﷲ ވިސާމެވެ.
ހދ.ގެ ޗެމްޕިއަން ނާވައިދޫއާއި، ހއ.ގެ ޗެމްޕިއަން މާރަންދޫ ބައްދަލުކުރާ ޒޯން 1ގެ ފައިނަލް މެޗު އޮންނާނީ މާދަމާރޭ 20.00ގައެވެ. މި ފޯރިގަދަ ފައިނަލް މެޗުގެ ފޯރި ގަދަކުރުމަށް ހއ. އަތޮޅާއި، ހދ. އަތޮޅުގެ ސަޕޯޓަރުން ހާޒިރުވުމަކީ ކުޅުންތެރިންގެ ބުންވަރު އިތުރުކޮށްދޭނެ ކަމެކެވެ.
