މިހާރު ހިނގަމުންދާ ގޯލްޑަން ފުޓްސަލް މުބާރާތުގައި ކެލާ، ހޯރަފުށްޓާއެކު އަދި ފިއްލަދޫ، ތުރާކުނާއެކު މިއަދު ހަވީރު ކުޅޭނެއެވެ.
މިއަދުގެ މެޗަށް ނުކުންނަ އިރު ހޯރަފުށި ފިޔަވާ އަނެއް 3 ޓީމުން ވެސް ވަނީ އެއް މެޗު ކުޅެފައެވެ. ފައިދާ ގޯލުގެ ތަފާތުން ގުރޫޕުގެ 1 ވަނަގައި އޮތް ކެލާ ވަނީ ތުރާކުނާއެކު ކުޅެ މޮޅުވެފައެވެ. ގުރޫޕުގެ 2 ވަނާގައި އޮތް ފިއްލަދޫ ވަނީ ބާރަށާއެކު ކުޅެ މޮޅުވެފައެވެ. 5 ޓީމު ހިމެނޭ މި ގުރޫޕުން ކެލައާއި، ފިއްލަދޫ ފިޔަވާ އެހެން ޓީމަކަށް އަދި އޮތީ ޕޮއިންޓެއް ނުލިބިއެވެ.
މިއަދު ހަވީރު 4.00 ގައި ހުޅުމާލޭ ރެހެންދި ފުޓްސަލް ދަނޑުގައި ކުޅެވޭ މި ދެ މެޗަކީ ވެސް ފޯރި ގަދަވެގެންދާނެ މެޗުތަކެއް ކަމަށް ބެލެވެއެވެ. ސަބަބަކީ މިއަދު ކުޅޭ ހޯރަފުށްޓަކީ ވެސް މި ގުރޫޕުގައި ދެން ހުރި ޓީމުތަކަށް ދޫނުކުރާ ވަރުގެ މޮޅު ކުޅުންތެރިން ތިބި ޓީމަކަށް ވުމެވެ. ޚާއްޞަކޮށް ބޮޑު ތަފާތަކުން ފުރަތަމަ މެޗުން ކެލާ މޮޅުވެފައި އޮތުމަކީ ހޯރަފުށިން އިތުރަށް ސަމާލުކަންދޭނެ ކަމަކަށް ވުމީ ވެސް ކެލާ، ހޯރަފުށި މެޗުގެ އިތުރަށް ވާދަވެރިވާނެ ކަމެކެވެ.
މި ގޮތަށް ބަލައި އިރު ފިއްލަދޫ ތުރާކުނު މެޗު ވެސް ފޯރި ކުޑަވެދާނެ ކަމަކަށް ނުބެލެވެއެވެ. ސަބަބަކީ ތުރާކުނު ފުރަތަމަ މެޗުން ބަލިވެފައި އޮތުމުން އައު ހިތްވަރެއް އެ ޓީމުން ދައްކަންޖެހިފަ އޮތް އޮތުމެވެ. އަދި ގުރޫޕުގެ 1 ވަނައަށް އެރުމަށް ފިއްލަދޫ ވެސް މި މެޗުގައި ތުރާކުނު ކޮޅަށް ރަނގަޅު ޙަމަލާތަކެއް އުފައްދަފާނެ ކަމަށް ބެލެވުމެވެ.
ހއ. ކެލައާއި، ހޯރަފުށްޓާއި، ފިއްލަދޫއާއި އަދި ތުރާކުނުން ވެސް ދެވެން ތިބި އެންމެން މިއަދު ހަވީރު ރެހެންދި ފުޓްސަލް ދަނޑަށް ދާންވީއެވެ. ރަށަށް ޓަކައި މި ޓީމުތަކަށް ހިތްވަރު ދިނުމަށެވެ. ވަޠަނީ ވިންދު ޖަހައި ބަޔަކު ތިބިކަން ސާބިތުކޮށްދޭށެވެ.
