ތިލަދުންމަތީ އުތުރުބުރީ އަތޮޅު ކައުންސިލުން އިންތިޒާމުކޮށްގެން ކެލާ ކައުންސިލުން ކުރިއަށް ގެންދިޔަ ތިލައުތުރު މަސްރޭސް 2025ގެ 1 ވަނަ ކެލާ، ނަޒީ ފިޝިންގ ހޯދައިފިއެވެ.
މި އަހަރުގެ މަސްވެރިންގެ ދުވަހާ ގުޅިގެން ކުރިއަށް ގެންދިޔަ މި މަސްރޭހުގައި 15 ޓީމަކުން ވާދަކޮށްފައި ވެއެވެ. އެއީ ބާރަށުން 3 ޓީމާއި، ދިއްދޫއިން ޓީމަކާއި، އުތީމުން ޓީމަކާއި، ފިއްލަދޫއިން ޓީމަކާއި، މުރައިދޫއިން ޓީމަކާއި އަދި ކެލާއިން 8 ޓީމެވެ.
ތިލައުތުރު މަސްރޭސް 2025ގެ ނަތީޖާ ފާޅުކުރުމަށް، ރޭ ކެލާ ލިލީ ޕްރީ ސުކޫލުގެ ގޯތިތެރޭގައި ބޭއްވި ރަސްމިއްޔާތު ޝަރަފުވެރިކޮށްދެއްވީ ރައްޔިތުންގެ މަޖިލީހުގެ ކެލާ ދާއިރާގެ ޢިއްޒަތްތެރި މެންބަރު އަލްފާޟިލް ޢަބްދުﷲ ޝަރީފެވެ. މި ރަސްމިއްޔާތު އެމްޕީ ޝަރީފު ދެއްކެވި ވާހަކަފުޅުގައި ވާދަވެރި ރޫޙެއް މަސްވެރިންގެ ތެރޭގައި އުފައްދާ މަސްވެރިކަމުގެ ސިނާއަތު ކުރިއެރުވުމުގެ ގޮތުން ހއ. އަތޮޅު ކައުންސިލުން ކުރައްވަމުންދާ މަސައްކަތަށް ޝުކުރު އަދާކުރެއްވިއެވެ.
މި ރަސްމިއްޔާތުގައި ރައްޔިތުންގެ މަޖިލީހުގެ ކެލާ ދާއިރާގެ ޢިއްޒަތްތެރި މެންބަރު ޢަބްދުﷲ ޝަރީފު ދެއްކެވި ވާހަކަފުޅުގައި މަސްވެރިކަމުގެ ސިނާއަތު ފުޅާކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ މުހިންމު ސިޔާސަތެއް ކަމުގައި ވިދާޅުވިއެވެ. އަދި މަސްވެރިކަން ކުރިއެރުވުމަށް އަދުގެ ސަރުކާރުން ކުރައްވަމުންދާ ބައެއް މަސައްކަތްތަކުގެ ތަފްޞީލުތައް ދެއްވިއެވެ.
ތިލައުތުރު މަސްރޭސް 2025 ގެ ފަޚުރުވެރި 1 ވަނަ ކެލާ ނަޒީ ފިޝިންގްސް ހޯދި އިރު 2 ވަނަ ހޯދީ ފިއްލަދޫ ކަލަރ ބިބީ ފިޝިންގއިންނެވެ. 3 ވަނަ ހޯދީ ކެލާ އުސްގަނޑު ފިޝިންގއެވެ. އެންމެ ބަރު މަސް ބޭނީ އުތީމު ހައްސަ ޓީމުގެ އިބްރާހީމެވެ. މި އަހަރުގެ މަސްވެރިންގެ ދުވަހާ ގުޅިގެން ބޭއްވި މަހުގެ ބާވަތްތަކުން ކާބޯތަކެތި އުފެއްދުމުގެ މަޢުރަޒުން 1 ވަނަ ހޯދީ ހއ. ކެލާ ހޯދި، ޝަހުދާ އިބްރާހީމެވެ.
