ތިލަދުންމަތީ އުތުރުބުރީ ކެލާގައި ޕާސްޕޯޓާއި، އައިޑީ ކާޑު ޕްރިންޓުކުރުމުގެ ޚިދުމަތް، ރައްޔިތުންގެ މަޖިލީހުގެ ކެލާ ދާއިރާގެ ޢިއްޒަތްތެރި މެންބަރު ޢަބްދުﷲ ޝަރީފު ފައްޓަވައި ދެއްވައިފިއެވެ.
މި ޚިދުމަތްތައް ފެށުމުގެ ގޮތުން ބޭއްވި ރަސްމިއްޔާތު ޝަރަފުވެރިކޮށްދެއްވާ ކެލާ ދާއިރާގެ މެންބަރު ޢަބްދުﷲ ޝަރީފު ދެއްކެވި ވާހަކަފުޅުގައި ޒަމާނުން ސުރެ މާލެއަށް ޖަމާކޮށްފައިވާ ބާރުތައް އެ ބައެއްގެ އަމިއްލަ ރަށުގައި ތިބެގެން ލިބޭނެ ގޮތް ހަމަޖައްސައި ދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ހަރުދަނާ ސިޔާސަތުގެ ތެރޭން ޕާސްޕޯޓާއި، އައިޑީ ކާޑު ޚިދުމަތް ކެލައިން ލިބޭނެ ގޮތް ފަހިކޮށް ދެއްވީތީ އިޚްލާޞްތެރިކަމާއެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށާއި، މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޯލަޒީ ޢަލީ އިޙްސާނަށް ޝުކުރުއަދާކުރެއްވިއެވެ.
މި ރަސްމިއްޔާތުގައި އެމްޕީ ޝަރީފު ދެއްކެވި ވާހަކަފުޅުގައި ޚިދުމަތެއް ފެށުމަށް ވުރެ ޚިދުމަތް ދެމެހެއްޓުން މުހިންމު ކަމަށް ވިދާޅުވެ، ފެށުނު ޚިދުމަތްތައް ދެމެހެއްޓުމަށް ހިތްވަރާއެކު މަސައްކަތްކުރެއްވުމަށް ކައުންސިލްގެ މެންބަރުންނަށް އިލްތިމާސްކުރެއްވިއެވެ.
މިއަދު ފެށި މި ޚިދުމަތްތަކުގެ ތެރެއިން އެންމެ ފުރަތަމަ ޕާސްޕޯޓު ދޫކުރެއްވީ ކެލާ ހުސްނުހީނާގޭ މަރިޔަމް ޒަހީނާއަށެވެ. ފުރަތަމަ އައިޑީ ކާޑު ދޫކުރެއްވީ ދޫރެސް ފާޠިމަތު ޝަހުޒާ އަށެވެ.
އާބާދީގާ ގާތްގަނޑަކަށް 2500 މީހުން ދިރިއުޅޭ ކެލާގައި މި ޚިދުމަތްތައް ފެށިގެން ދިޔުމަކީ ކެލާ ރައްޔިތުންގެ އިތުރުން ކެލާ ދާއިރާގެ ރައްޔިތުންނަށް ވެސް ލިބިގެން ދިޔަ ވަރަށް ބޮޑު ހިތްހަމަޖެހުމެކެވެ.
