ރައްޔިތުންގެ މަޖިލީހުގެ ކެލާ ދާއިރާގެ އެމްޕީ، ކެލާ ރައްޔިތުންނާ ބައްދަލުކުރައްވަނީ
ރައްޔިތުންގެ މަޖިލީހުގެ ކެލާ ދާއިރާގެ އެމްޕީ އަލްފާޟިލް ޢަބްދުﷲ ޝަރީފު، ކެލާގެ ލޮބުވެތި ރައްޔިތުންނާ ބައްދަލުކުރެއްވުން މިރޭ ކެލާގައި އޮންނާނެ ކަމަށް ކެލާ ކައުންސިލުން ހާމަކޮށްފިއެވެ.
ކެލާ ކައުންސިލުން އާންމުކުރެއްވި ފޭސްބުކް ޕޯސްޓުގައި ވާގޮތުން މި ބައްދަލުން އޮންނާނީ މިރޭ 8.45ގައި ލިލީ ޕްރީ ސުކޫލުގައެވެ. ކެލާ ކައުންސިލްގެ އާންމުކުރި ޕޯސްޓްގައި، ކެލާގެ އެންމެހައި ރައްޔިތުންނަށް މި ބައްދަލުގައި ބައިވެރިވެ ދެއްވުން އެދި ދަޢުވަތު އަރުވާފައި ވެއެވެ.
މި ބައްދަލުވުމާ ގުޅޭ ގޮތުން، އެމްޕީ ޝަރީފު ވިދާޅުވީ ބައްދަލުވުން ބާއްވަނީ ކެލާގެ ތަރައްޤީއަށް ކުރަން ރޭވިފައިވާ ކަންތައްތަކާއި، އެ ކަންތައްތަކުގެ އެންމެ ފަހުގެ އަދާހަމަ މަޢުލޫމާތު ރައްޔިތުންނަށް ފޯރުކޮށްދީ، ރައްޔިތުންގެ ހުރި ކަންބޮޑުވުންތައް ގާތުން އަޑުއެހުމުގެ މަޤްޞަދުގައި ކަމަށެވެ.
ދާއިރާގެ މެންބަރުން ދާއިރާގެ ރައްޔިތުންނާ ބައްދަލުކުރެއްވުމަކީ، އެ މެންބަރުން ހޮއްވެވި ރައްޔިތުން އަބަދުވެސް އެދިއެދި ހުންނަ ކަމެކެވެ. އަދި ރައްޔިތުންގެ ވާހަކަތައް އެ މެންބަރުން އަޑުއެއްސެވުމަކީ އެ ރައްޔިތުން އިންތިހާއަށް ބޭނުންވެފައިވާ ކަމެކެވެ.
މިރޭގެ ބައްދަލުވުމަށް ގިނަ ޢަދަދެއްގެ ބަޔަކު ހާޒިރުވުމަކީ އެމްޕީ ޝަރީފުގެ ވަރަށް ބޮޑު އެދުމެކެވެ. އަދި މި ފަދަ ބައްދަވުންތައް އާންމުކޮށް ދާއިރާގެ ރަށްތަކުގައި ބޭއްވުމަށް އެމްޕީއަށް ލިބިގެންދާނެ ހިތްވަރަކަށް ވެސް ވާނެއެވެ.
