1446 ވަނަ އަހަރުގެ ބޮޑު ޢީދު ޙަރަކާތްތައް ކެލާ ކައުންސިލާ ގުޅިގެން، ކެލާގައި ކުރިއަށް ގެންދިޔުމަށް ކެލާ ޔޫތު ފޯރަމާ ރަސްމީކޮށް ޙަވާލުކޮށްފި
1446 ވަނަ އަހަރުގެ ބޮޑު ޢީދު ޙަރަކާތްތައް ކެލާ ކައުންސިލާ ގުޅިގެން، ކެލާގައި ކުރިއަށް ގެންދިޔުމަށް ކެލާ ޔޫތު ފޯރަމާ ރަސްމީކޮށް ޙަވާލުކޮށްފިއެވެ. އެ ކަމާ ގުޅިގެން ކެލާ ކައުންސިލުން ކުރި އިޢުލާނަށް ހަމައެކަނި ޕްރޮޕޯސަލް ހުށަހެޅި ފަރާތްކަމުގައިވާ ކެލާ ޔޫތު ފޯރަމަށް އެ މަސައްކަތް ޙަވާލުކުރީ މިއަދު އެ ކައުންސިލްގެ އިދާރާގައި ބޭއްވި ރަސްމިއްޔާތެއްގައެވެ.
ކެލާ ޔޫތު ފޯރަމްގެ ފަރާތުން އެ އެއްބަސްވުމުގައި ސޮއިކުރެއްވީ ޔޫތު ފޯރަމްގެ ރައީސް އަލްފާޟިލް އިބްރާހީމް ޢާމިރު ޢުޘްމާނެވެ. އެ ކައުންސިލްގެ ފަރާތުން އެއްބަސްވުމުގައި ސޮއިކުރެއްވީ ކައުންސިލްގެ ރައީސް ޢަބްދުﷲ އިންފާޒެވެ.
“ޢީދު މަހާސަމާ 1446 – ހއ. ކެލާ”ގެ ނަމުގައި ކުރިއަށްގެންދާ މި އަހަރުގެ ޢީދު ޕްރޮމޯޝަން ލަވަ ކުރިއަށް އޮތް 10 ވަރަކަށް ދުވަހުތެރޭ ސޯޝަލްމީޑިއާއަށް ދޫކޮށްލުމަށް އެ ޖަމްޢިއްޔާއިން މިހާރު އަންނަނީ ތައްޔާރުވަމުންނެވެ. މި ފަހަރުގެ ޢީދު ކުލަގަދަކޮށް ކެލާގައި ފާހަގަކުރުމަށް ވާންޖެހޭ ތައްޔާރީތައް ރަށާއި، އަދި މާލޭގައި ވެސް ކުރިއަށް ގެންދާ އިރު ރަށުގެ ރައްޔިތުންގެ ފަރާތުން ވަރަށް ބޮޑު ތަރުހީބެއް ލިބެމުން އަންނަ ކަމަށް ރައީސް ޢާމިރުސަރ ވިދާޅުވިއެވެ.
މި ޢީދުގައި ގޮމަ ގުރޫޕާއި، ހަނިމާދޫ ބޭންޑާއި، މުލީ ލަނގިރި ގުރޫޕުގެ އިތުރުން ކެލާގެ ދެ ޖިންސުގެ ފަރި ޙަރަކާތްތަކާއި، ސަގާފީ ކުޅިވަރުތަކުގެ އިތުރުން ފޯރި ގަދަ ބައެއް މުބާރާތްތައް ބޭވުމަށް ހަމަޖެހިފައި ވެއެވެ.
