ދިވެހިރާއްޖޭގެ ފުޓުބޯޅައިގެ މައި އިދާރާ އެފްއޭއެމްގެ މެންބަރުކަން ހއ. ދިއްދޫއަށް ލިބިއްޖެއެވެ. މިއި ރާއްޖޭގެ އެކި ކަންކޮޅުތަކުގައި ފުޓްބޯޅަ ކުރިއަރުވައި ފުޅާކުރުމަށް އެފްއޭއެމުން ކުރަމުންދާ މަސައްކަތްތަކުގެ ތެރެއިން، ދިއްދޫއަށް ލިބިގެން ދިޔަ ވަރަށް މުހިންމު ފުރުޞަތެކެވެ. ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ދާއިމީ މެންބަރުކަން ދިއްދޫގެ އިތުރުން ގދ. ގައްދޫއަށް ވެސް ވަނީ ދެއްވާފައެވެ. އަތޮޅުތެރޭގެ ދެ ރަށެއް މި ފުރުޞަތު ދެއްވުމަށް ފާސްކުރެއްވީ އެފްއޭއެމްގެ ކޮންގްރެސްއިން ރޭގައެވެ.
ދިއްދޫއާއި، ގައްދޫއަށް މި ފުރުޞަތު ދެއްވުމަށް ފާސްކުރެއްވީ އެފްއޭއެމްގެ ކޮންގްރެސްގައި ބައިވެރިވި މެންބަރުންގެ އިއްތިފާގުންނެވެ. މިއީ ރާއްޖޭގެ ފުޓްބޯޅަ ލާމަރުކަޒީކޮށް، އަތޮޅުތަކުގެ ޓީމުތަކަށް އެސޯސިއޭޝަންގެ މުހިންމު ނިންމުންތަކުގައްޔާއި ވާދަވެރި މުބާރާތްތަކުގައި ފުރިހަމަ ބައިވެރިވުން ކަށަވަރުކޮށްދިނުމަށް އެޅުނު ވަރަށް ހަރުދަނާ ފިޔަވަޅެކެވެ. ގައްދޫއާއި، ދިއްދޫއަކީ ރާއްޖޭގެ ފުޓްބޯޅައިގައި ރަނގަޅު ކާމިޔާބީތަކެއް ހޯދަމުން އަންނަ ދެ ރަށެވެ.
ދިވެހި ޕްރިމިއާ ލީގު ކޮލިފިކޭޝަނަށް އަލަށް ގެނައި ބަދަލުތަކާއެކު ރާއްޖޭގެ އެންމެ ޝަރަފުވެރި ލީގުން ފުރުސަތު ހޯދާފައިވާ އަތޮޅުތެރޭގެ ޓީމުތަކަށް ދާއިމީ މެންބަރުކަން ލިބުމުން، އެފްއޭއެމްގެ އިންތިޚާބުތަކުގައި ވޯޓުލުމާއި ބަސްބުނުމުގެ ހައްގު ލިބޭނެއެވެ.
ރާއްޖޭގެ ހުރިހާ ސަރަހައްދެއްގައި ވެސް ފުޓްބޯޅަ ތަރައްގީކޮށް، ޤައުމީ ފެންވަރުގައި ވާދަކުރުމުގެ ހަމަހަމަ ފުރުޞަތު ހުރިހާ ދިމާއަކަށް ފަހިކޮށްދިނުމަކީ އެފްއޭއެމްގެ ވަރަށް މުހިންމު ސިޔާސަތެކެވެ. އަދި ކޮންގްރެސްއިން ފާސްކުރި މި ނިންމުމަކީ ދިވެހި ފުޓްބޯޅައަށް ލިބުނު އިތުރު ކުރިއެރުމެއްކަމުގައި ބެލެވެއެވެ.
ދިއްދޫ ހޯދި ފަޚުރުވެރި މި ކާމިޔާބަށް ޓަކައި ތިލައުތުރު ނޫހުގެ ފަރާތުން ހޫނު މަރުޙަބާއާއި ތަހުނިޔާ ދަންނަވަމެވެ. ހއ. އަތޮޅުގެ އެންމެހައި ރައްޔިތުން ވެސް ޤަބޫލުކުރަނީ މިއީ އަތޮޅަށް ވެސް ލިބުނު ބޮޑު ފަޚުރެއް ކަމަށެވެ.
