ކީރިތި ޤުރްއާން ކިޔެވުމުގެ 37 ވަނަ ޤައުމީ މުބާރާތުން ކެލާ ޔޫތު ފޯރަމަށް ލިބުނު ކާމިޔާބު ފާހަގަކުރުމަށް ޙަފުލާއެއް ބާއްވައިފި
ކީރިތި ޤުރުއާން ކިޔެވުމުގެ 37 ވަނަ ޤައުމީ މުބާރާތުން ކެލާ ޔޫތު ފޯރަމަށް ލިބުނު ކާމިޔާބު ފާހަގަކުރުމަށް ރޭ ޗައިނާ ގަރޑަން ސީވިޔުގެ ފުރަތަމަ ފަންގިފިލާގައި ޚާއްޞަ ޙަފުލާއެއް ބާއްވައިފިއެވެ.
ރައްޔިތުންގެ މަޖިލީހުގެ ކެލާ ދާއިރާގެ ޢިއްޒަތްތެރި މެންބަރު އަލްފާޟިލް ޢަބްދުﷲ ޝަރީފު ޝަރަފުވެރިކޮށްދެއްވި މި ޙަފުލާގައި ޤުރުއާން ކިޔެވުމުގެ 37 ވަނަ ޤައުމީ މުބާރާތުގެ ބަލައިގެން ކިޔެވުމުގެ ގޮފިންނާއި، ހިތުން ކިޔެވުމުގެ ގޮފިން 1 ވަނަ މުއައްސަސާގެ ފަޚުރުވެރި ވަނަ ކެލާ ޔޫތު ފޯރަމަށް ހޯދައިދިން ޓީމުގެ ދަރިވަރުންނަށް އެ ކަމުގެ އަގުވަޒަންކޮށް ވަކިވަކިން ދިން ހަނދާނީ ފިލާ ޙަވާލުކޮށްދެއްވީ ރައްޔިތުންގެ މަޖިލީހުގެ ކެލާ ދާއިރާގެ ޢިއްޒަތްތެރި މެންބަރު އަލްފާޟިލް ޢަބްދުﷲ ޝަރީފެވެ.
ކެލާ ޔޫތު ފޯރަމްގެ ޓީމު ތައްޔާރުކޮށްދެއްވި މުދައްރިސުން ކަމުގައިވާ ޢަލީ އަޙްމަދު މުޙައްމަދަށާއި، ނައުފާން ނިޔާފަށް، އެ ކަމުގެ އަގުވަޒަންކޮށް އެރުވި ހަނދާނީ ފިލާ ޙަވާލުކޮށްދެއްވީ ވެސް ކެލާ ދާއިރާގެ ޢިއްޒަތްތެރި މެންބަރު ޢަބްދުﷲ ޝަރީފެވެ.
މި ރަސްމިއްޔާތުގައި ޤުރުއާން ކިޔެވުމުގެ 37 ވަނަ ޤައުމީ މުބާރާތަށް މާލީ ގޮތުން އެ ޖަމްޢިއްޔާއަށް އެހީތެރިވެ ދެއްވި ކިހައްޑިހަ އިންވެސްޓްމަންޓަށް ވެސް ހަނދާނީ ފިލައެއް ވަނީ އަރުވާފަވެއެވެ.
މި ރަސްމިއްޔާތުގައި މުބާރާތުގައި ވާދަކުރި ދަރިވަރުންނަށް ހަނދާނީ ލިޔުން ޙަވާލުކޮށް ދެއްވީ ހޯމް ލޭންޑް ސެކްއުރިޓީ އެންޑް ޓެކްނޯލޮޖީގެ ޑެޕިޔުޓީ މިނިސްޓަރ އަލްފާޟިލް ޙަސަން ވަޙީދެވެ. ރޭ އޮތް މި ޙަފުލާގައި މުބާރާތުގައި ވާދަކުރި އެންމެހައި ދަރިވަރުންނާއި، އެ ދަރިވަރުންގެ ބެލެނިވެރިން ވެސް ބައިވެރިވެލެއްވިއެވެ.
ކެލާ ޔޫތު ފޯރަމަކީ އެ ޖަމްޢިއްޔާ އުފެދުނީން ސުރެ ކީރިތި ޤުރުއާނުގެ ޢިލްމު ފެތުރުމަށް އަދި ވާދަވެރި ފުރުޞަތުތައް ޤުރްއާން ކިޔަވާ ކުދިންނަށް ހޯދައިދިނުމަށް އަބަދުވެސް މަސައްކަތްކުރަމުން އަންނަ މަދަނީ ޖަމްޢިއްޔާއެކެވެ.
