މީޑިއާތަކަށް ދައުލަތުން ފައިސާގެ އެހީ ދިނުމުގެ އާ އުޞޫލު މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނުން އެކުލަވާލައި އިއްޔެ ގެޒެޓްކޮށްފިއެވެ. މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނުން މި ބަދަލު ގެނެސްފައި ވަނީ މީޑިއާތަކުގައި މަސައްކަތްކުރައްވާ ފަރާތްތަކާ ބައްދަލުކުރައްވާ ކުރެވުނު މަޝްވަރާތަކުގެ އަލީގައެވެ.
މީޑިއާތަކަށް ދައުލަތުގެ ބަޖެޓުން މާލީ އެހީތެރިކަން ފޯރުކޮށްދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ވަޢުދުފުޅު ތަންފީޒުކުރުމުގެ ގޮތުން ގެނައި މުހިންމު މި ބަދަލުތަކުގެ ސަބަބުން ދައުލަތުން ދެއްވާ މާލީ އެހީތެރިކަން ލިބިލައްވާ މީޑީއާތަކުގެ ޢަދަދު ބޮޑުތަނުން އިތުރުވާނެއެވެ.
އިއްޔެ އާންމުކުރި އައު އުޞޫލުގެ ދަށުން، މި ދިޔަ އަހަރުގެ ޖަނަވަރީ މަހުން ފެށިގެން ރަޖިސްޓަރީކޮށް، ލައިސަންސް ލިބިގެން މެދުނުކެނޑި ހިންގަމުންދާ މީޑިއާތަކަށް މި އެހީއަށް އެދުމުގެ ފުރުސަތު ލިބޭނެއެވެ. ކުރީގެ އުޞޫލުގައި އެހީދޭ އުމުރެއްގެ ގޮތުގައި ކަނޑައަޅައިފައި އޮތީ ތިން އަަހަރެވެ.
ގެޒެޓު ކޮށްފައިވާ އައު އުޞޫލުގައި ވާގޮތުން ފައިސާ ދިނުމުގައި ވެސް ބަދަލުތަކެއް ވަނީ ގެނެސްފައެވެ. އެ ގޮތުން ކުރީގެ އުޞޫލުގައި އެކި ފަހަރު މަތިން ފައިސާ ދޫކުރާ ގޮތަށް އޮތް ނަމަވެސް، އައު އުޞޫުގެ ދަށުން އެހީ ލިބޭ މީޑިއާތަކަށް ކަނޑައަޅައި ފައިސާ ދޫކުރާނީ އެއްކޮށެވެ.
ނުފޫޒުން އެއްކިބާވެފައިވާ މިނިވަން މީޑިއާއެއްގެ ގޮތުގައި، މީޑީއާތައް ހިންގުމަށް އެހީތެރިވެ ދިނުމުގެ ގޮތުން ދައުލަތުގެ ބަޖެޓުގައި ހިމަނައިގެން މީޑިއާތަކަށް މާލީ އެހީތެރިކަން ފޯރުކޮށް ދިނުމަކީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ރިޔާސީ ވަޢުދެކެވެ. ރައީސް ޑޮކްޓަރ މުޙައްމަދު މުޢިއްޒުގެ ސަރުކާރު ވެފައި މި ވަނީ އަމިއްލަ މީޑިއާތަކަށް މާލީ އެހީތެރިކަން ދޫކުރާ ފުރަތަމަ ސަރުކާރަށެވެ.
