ރޯދައާ ބެހޭ ޙުކުމްތައް އުނގެނި ރަމަޟާން މަހުގެ ރޯދަހިފުމަށް ތައްޔާރުވުމަށް ޚުޠުބާގައި ގޮވާލައްވައިފި
ރޯދައާ ބެހޭ ޙުކުމްތައް އުނގެނި ރަމަޟާން މަހުގެ ރޯދަހިފުމަށް ތައްޔާރުވުމަށމި އަހަރުގެ 4ވަނަ ހުކުރު ޚުޠުބާގައި ގޮވާލައްވައިފިއެވެ. މި ކަމަށް ގޮވާލައްވާފައި ވަނީ ޝަޢުބާން މަހު ކުރެވޭ ހެޔޮ ޢަމަލު” މި މައުޟޫގެ ދަށުން، 2026 ވަނަ އަހަރުގެ ޖަނަވަރީ މަހުގެ 23ވަނަ ދުވަހު އިއްވި ހުކުރު ޚުޠުބާގައެވެ.
އެހެން ޚުޠުބާތަކެކޭ އެއް ގޮތަށް ޚުޠުބާ ފައްޓަވާފައިވަނީ ނަބީބޭކަލުންނާއި، ރަސޫލުބޭކަލުން ޚިޔާރުކުރެއްވި ގަދަކީރިތިވަންތަ މާތްﷲއަށް ޙަމްދު ޘަނާ ދެންނެވުމާއެކު އެކަލާނގެ ރަސޫލުކަމާއިގެން ފޮނުއްވައި މާތްﷲގެ ރިސާލަތު ފުރިހަމަކުރެއްވި ރަސޫލާއަށް ޞަލަވާތާއި ސަލާމް ލެއްވުން އެދި ދުޢާކުރަމުންނެވެ. އަދި މިޞަލަވާތާއި ސަލާމުގައި އެކަލޭގެފާނުގެ އާލު އަޞްޙާބުންނާއި ހެޔޮގޮތުގައި ތަބަޢަވީ އެންމެން ޝާމިލް ކޮށްފައި ވެއެވެ. ހަމައެހެންމެ މާތްﷲ އަށް ތަޤުވާގެރިވުމަށާއި މާތްﷲ ފިޔަވާ ޙައްޤުވެގެން އަޅުކަންކުރެވޭ އެހެންފަތާރެއް ނުވާކަމަށާއި، އެކަލާނގެއަށް ޝަރީކުނުކުރުމަށް ހުރިހާ މުސްލިމުންނަށް ހަނދާންކޮށްދެއްވާފައި ވެއެވެ.
“ޝަޢުބާން މަހު ކުރެވޭ ހެޔޮ ޢަމަލު” މި މައުޟޫޢުގެ މައްޗަށް ބިނާކޮށް މިއަދު އިއްވި ޚުތުބާގައި ހާމަކުރެއްވި ގޮތުގައި މިހާރު އަހަރެމެން ގުނަމުންދާ ޝަޢުބާން މަހަކީ ރަމަޟާން މަހަށް މަރުޙަބާ ކިޔުމަށް ޓަކައި ތައްޔާރުވާން އޮތް ޚާއްޞަ މަހެވެ. އެ ގޮތުން، ރޯދައާ ގުޅޭ ދީނީ ޙުކުމްތައް އުނގެނުމަށާއި، މި މަހު ސުންނަތް ރޯދަ ހިފައި، ހެޔޮ ޢަމަލުތައް ގިނަކޮށް އަޅުކަމުގައި ހީވާގިވުމަށް ޚުތުބާގައި ބާރުއަޅާފައިވެއެވެ.
މީގެ އިތުރުން ޝަޢުބާން މަހަކީ މީސްތަކުން އެ މަހަކާ މެދު ޣާފިލުވެފައިވާ މަހެއް ކަމަށާއި، ނަމަވެސް އެއީ ޢާލަމްތަކުގެ ވެރި ރަސްކަލާނގެ ޙަޟުރަތަށް އަޅުތަކުންގެ ޢަމަލުތައް އުފުއްލެވޭ މަސް ކަމަށް ވެސް ހާމަކުރައްވާފައި ވެއެވެ.
މިއަދު އިއްވި ހުކުރު ޚުޠުބާގައި އިސްލާމީ ތާރީޚުގައި ޝަޢުބާން މަހު ހިނގާފައިވާ މުހިންމު ކަންކަމުގެ މައްޗަށް ވެސް ބަލައިލައިފާ ވެއެވެ. އެ ގޮތުން މި މަހަކީ މުސްލިމުންގެ ޤިބުލަ އަލްމަސްޖިދުލްއަޤްޞާއިން ކަޢުބަތުﷲ ގެފުޅަށް ބަދަލުވި މަސް ކަމަށް ގިނަ ޢިލްމުވެރިން ވިދާޅުވާކަން ޚުތުބާގައި ފާހަގަކުރިއެވެ. އަދި ޝަޢުބާން މަހުގެ ފަނަރަވިލޭރޭގެ މަތިވެރިކަމާ ބެހޭ ގޮތުން ވާހަކަދައްކަމުން، އެ ރޭ މާތް الله މުއުމިނުންގެ ފާފަ ފުއްސަވައިދެއްވާނެ ކަމަށާއި، ނަމަވެސް އެ ރެއަށް ޚާއްޞަ ވަކި ނަމާދެއް ނުވަތަ ދުޢާއެއް އޮތްކަން ޞައްޙަ ސަނަދުން ސާބިތުނުވާ ކަމަށް ބަޔާންކުރައްވާފައި ވެއެވެ.
މިއަދުގެ ޚުޠުބާގައި ރަމަޟާން މަހަށް ތައްޔާރުވުމުގެ ގޮތުން ރޯދަ ގެއްލޭ ކަންތައްތަކާއި، ޤަޟާކުރުމާއި ފިދުޔައިގެ ޙުކުމްތައް އަމިއްލައަށް އުނގެނި، އަނބިދަރިންނަށް ދަސްކޮށްދިނުމަށާއި، ވޭތުވެދިޔަ އަހަރުތަކުގައި ނުހިފި ހުރި ފަރުޟު ރޯދަތައް މި މަސް ނިމުމުގެ ކުރިން ހިފައި ނިންމުމަށާއި، ރަމަޟާން މަހަކީ އިސްރާފުކުރާ މަހަކަށް ނުހަދައި، ދީލަތިކަމާއެކު ޞަދަޤާތްކުރުމަށް ނިޔަތްގަތުމަށާއި، ވިޔަފާރިވެރިން އަގުތައް ހެޔޮކޮށް ދީލަތިވުމަކީ ބޮޑުވެގެންވާ ޘަވާބު ލިބޭނެ ކަމެއް ކަމުގައި ބަޔާންކުރުމުގެ އިތުރުން ދުލާއި ގުނަވަންތައް ފާފަތަކުން ރައްކާތެރިކޮށް، ޒުވާބުކުރުމާއި ހުތުރު ބަސްތަކުން ދުރުހެލިވުމަށް ގޮވާލައްވާފައި ވެއެވެ.
ޚުޠުބާ ނިންމަވާލައްވާފައި ވަނީ ރަމަޟާން މަހަކީ ކީރިތި ޤުރުއާނުގެ މަސް ކަމަށް ވާތީ، ޤުރުއާން ކިޔެވުމާއި، ދީނީ ދަރުސްތައް އަޑުއެހުމަށް ޚާއްޞަ ސަމާލުކަންދީ، މުޅި ރަމަޟާން މަހުގެ ބޭނުން އެންމެ ހެޔޮގޮތުގައި ހިފުމަށް އަޒުމް ކަނޑައަޅަންޖެހޭ ކަމަށް ބުނެއެވެ. އަދި މި ޤައުމަށާއި، ޤައުމުގެ ކަންކަމަށް ރަނގަޅު ގޮތް ވުމަށާއި، ބަލިތަކުން ސަލާމާތްކޮށްދެއްވާ، ބަލިމީހުންނަށް ޝިފާދެއްވުމަށް އެދި ދުޢާކުރަމުންނެވެ. ޤައުމުގެ ކަންކަން އިސްލާމްދީނާ އެއް ގޮތަށް ކުރިޔަށް ގެންދިއުމަށް މަސައްކަތްކުރައްވާ ވެރީންނަށް ހެޔޮ ގޮތްވުމަށް އެދެމުންނެވެ.
