ތިލަދުންމަތީ އުތުރުބުރީ ކެލާ ރައްޔިތުންނަށް އެ ރަށު ކައުންސިލުން ހިލޭ ދެއްވި އަލައޮޅުތަކުގައި އިންދާނެ މުޑުވައް ދަނޑުވެރިކަމާއި ދިރޭތަކެއްޗާ ބެހޭ ވުޒާރާގެ އެހީތެރިކަމާއެކު ކެލާ ކައުންސިލުން ދެއްވައިފިއެވެ.
ދަނޑުވެރި ރައްޔިތަކު ދިރިއުޅޭ ކެލައަކީ އަންޒަމާނުންސުރެ ފުޅާ ދާއިރާއެއްގައި އަލަހައްދަމުން އަންނަ ރަށެކެވެ. މާލޭ ބާޒާރުގައި ވިއްކާ އޮޅުއަލަތަކުގެ ތެރެއިން އެންމެ އަގު ބޮޑު އޮޅުއަލައަކީ ކެލާ އަލަކަން ފާހަގަކޮށްލަން ޖެހެއެވެ. މާލޭ ލޯކަލް މާރުކޭޓުގެ ގޮޅިތައް ހިންގާ ބައެއް ފަރާތްތަކުން ބުނާ ގޮތުގައި ޙަޤީޤީ ދިވެހިއަލާގެ ރަހަ ލަނީ ކެލާ އޮޅުއަލާގައެވެ. އެ އަލާގެ އަގު ބޮޑުވަނީ އެސަބަސަށް ޓަކައެވެ.
ކެލާ ކައުންސިލްގެ ރައިސް ޢަބްދުﷲ އިންފާޒު ހާމަކުރެއްވި ގޮތުގައި މިހާރު ހިނގަމުންދާ ކައުންސިލުން 96 ފަރާތަކަށް ވަނީ ހިލޭ އަލައޮޅު ދެއްވާފައެވެ. އެ ފަރާތްތަކަށް ދެއްވާފައިވަނީ 200 އަކަފޫޓުގެ އޮޅެކެވެ.
ރާއްޖޭގެ ބިންގަނޑު އެންމެ ރަނގަޅު 5 ރަށުގެ ތެރޭގައި ހިމެނޭ ކެލާގެ ދަނޑުވެރިންނަށް ކަންކަން ފަހިކޮށްދެއްވުމަށް ކެލާ ކައުންސިލުން ވަނީ ހިނގަމުން މިދާ ދައުރުގައި މުހިންމު މަސައްކަތްތަކެއް ކޮށްދެއްވާފައެވެ. އެ ގޮތުން ދަނޑުވެރި ޢާއިލާތަކަށް 5000 އަކަފޫޓުގެ ބިމެއް ދަނޑުވެރިކަން ކުރުމަށް ދެއްވާފައިވާކަން ޝުކުރުވެރިކަމާއެކު ފާހަގަކުރަމެވެ.
ބައެއް ކަންކަމުގައި ބައެއް ރައްޔިތުންގެ ކަން ބޮޑުވުން ހުއްޓަސް ދަނޑުވެރިންނަށް ޓަކައި ކެލާ ކައުންސިލުން ކުރައްވާފައި ވަނީ ތަޢުރީފު ޙައްޤު މަސައްކަތްތަކެކެވެ. ކޮންމެ ކަމެއްގައި ވެސް އިޞްލާހުކުރަންޖެހޭ ކަންކަން ހުންނާނެއެވެ. އެ ގޮތުން ތަރުތީބުކޮށްފައިވާ ކަންކަމަކީ ވެސް ރައްޔިތުންގެ ޚިޔާލާއި، މަޝްވަރާގެ ތެރޭން ކުރިމަގުގައި ބަދަލުތަކެއް ނުގެވޭނެ ކަންކަމެއް ނޫނެވެ.
ކެލާގެ ދަނޑުބިމަށް ކަރަންޓްލުމަކީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިޒުގެ ވަޢުދުފުޅުގެ ތެރޭގައި ހިމެނޭ މުހިންމު ކަމަކަށްވީ އިރު އެ ވަޢުދުފުޅު އަވަސް ތާރީޚެއްގައި ފުރިހަމަ ވެގެން ދިޔުމަކީ ކެލާގެ ދަނޑުވެެރިން ދެކެމުން އަންނަ ހުވަފެނެކެވެ.
