ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ވަޢުދުފުޅުގެ ތެރޭގައި ހިމަނާފައިވާ ކެލާގެ މަގުތައް ޒަމާނާ އެއްގޮތަށް ބަދަލުކުރުމުގެ މަސައްކަތް ނުވަތަ މަގުތަކުގައި ތާރުއެޅުމުގެ ޢަމަލީ މަސައްކަތް މިއަދު މެންދުރުފަހު ފަށާ ގޮތަށް ހަމަޖެހިއްޖެއެވެ.
ތިލައުތުރު ނޫހަށް ލިބިފައިވާ މަޢުލޫމާތު ކުށްކަމުގައި ނުވާ ނަމަ މިއަދު 14.00ގައި ކެލާގައި އޮންނަ މި ރަސްމިއްޔާތު ޝަރަފުވެރިކޮށްދެއްވަނީ އާރުޑީސީގެ މެނެޖިންގ ޑިރެކްޓަރެވެ. އެމްޑީގެ އަރިހުގައި ރައްޔިތުންގެ މަޖިލީހުގެ ކެލާ ދާއިރާގެ ޢިއްޒަތްތެރި މެންބަރު ޢަބްދުﷲ ޝަރީފު ވެސް މި ރަސްމިއްޔާތުގައި ބައިވެރިވެވަޑައިގަންނަވާ ގޮތަށް ހަމަޖެހިފައި ވެއެވެ.
އެންމެ އިހުން ސުރެ ރީތި ހިތްގައިމު ބޮޑެތި މަގުތައް ހިމެނޭ، ކެލާގެ މަގުތައް ޒަމާނާ އެއްގޮތަށް ބަދަލުވެގެން ދިޔުމަކީ ކެލާ ރައްޔިތުންނަށް ލިބޭނެ އިތުރު ފަސޭަހައެކެވެ. ހަމަގައިމު ވެސް އެ މަގުތަކުގައި އިރުވައި މޫސުމުގައި ދުއްވާ އެއްޗެހީގެ ސަބަބުން އަރާ ހިރަފުހުން ލިބޭ ޞިއްޙީ ގެއްލުންތަކުން ރައްކާތެރިކަން ލިބޭނެއެވެ. އަދި ވާރޭކޮޅެއް ވެހިލައިފި ނަމަ ހެދޭ ކުދިކުދި މޫދުތަކާ، އޮޅުތަކުގައި އުފެދޭ ކިލާގަނޑުތަކުން ހިނގާބިނގާވާ މީހުންނަށް ލިބޭ ގެއްލުންތައް ކުޑަވެގެން ދާނެއެވެ.
މިއަދު ފަށާ މަގުހެދުމުގެ މަޝްރޫޢު ވެގެންދާނީ މި ސަރުކާރުން ކެލާގެ ތަރައްޤީއަށް ހިންގުމަށް ހަމަޖެހިފާއިވާ އެންމެ ބިޔަ އެއް މަޝްރޫޢަށެވެ. އޭގެ ހިތްފަސޭހަކަން މުޅި އެންމެނަށް ހިއްސާވާނެ ޕްރޮޖެކްޓަށެވެ.
ތިލައުތުރު ނޫހުން އުންމީދުކުރަނީ މިއަދު މިފަށާ މަޝްރޫޢު މަޑުނުޖެހި، ބާރުދުވެލީގައި ގެންގޮސް ނިންމާ އިރު، 10 މަގަށް ވުރެ ތާރުއެޅޭ މަގުތަކުގެ ޢަދަދު އިތުރުވާނެ ކަމަށެވެ. އަދި މަގުތަކާއެކު ރަށުގެ ޤުދުރަތީ މޫނުމަތި ޙިމާޔަތްކުރުމުގެ މަސައްކަތާ، ހުއްޓިފާ ހުރި ޞިއްޙީ މަރުކަޒުގެ މަސައްކަތުގެ އިތުރުން ފަޅުތެރޭގައި ހަދާ ރިސޯޓްތައް ވެސް ފެެނުން މައްޗަށް އުފުލޭތަން ފެންނަންފަށާނެ ކަމަށެވެ.
