މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ޚާއްޞަ އިނާމު ޢަލީ އަކުރަމާއި، މުފާޒާއަށް
މަތީ ދަރަޖަ ހޯދާފަރާތްތަކަށް ރައީސުލްޖުމްހޫރިއްޔާ ދެއްވާ ޚާއްޞަ އިނާމު ހއ. ކެލާ، އޮޅުހަލި ޢަލީ އަކުރަމާއި، ހއ. ކެލާ ކޯއްޓޭގޭ ފާޠިމަތު މުފާޒާއަށް ރައީސުލްޖުމްހޫރިއްޔާ ދެއްވައިފިއެވެ.
މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ޚާއްޞަ އިނާމަކީ، ޢިލްމާއި، ހުނަރާއި، އުފެއްދުންތެރިކަމުގެ ގޮތުން ހިތްވަރާއެކު ހޯދާ ކާމިޔާބީތައް ފާހަގަކުރުމުގެ ގޮތުން، ޤައުމީ ފެންވަރުގައި ރައީސުލްޖުމްހޫރިއްޔާ ދެއްވާ އިނާމެކެވެ. މި އަހަރު މި އިނާމު 4 ގިންތީއަކުން ދެއްވާފައި ވެއެވެ.
ޢަލީ އަަކުރަމަށާއި، ފާޠިމަތު މުފާޒާއަށް މި އިނާމު ރައީސުލްޖުމްހޫރިއްޔާ ދެއްވީ، ދިވެހިރާއްޖޭގެ 57 ވަނަ ޖުމްހޫރީ ދުވަސް ފާހަގަކުރުމަށް ސޯޝަލް އެޑިޔުކޭޝަން ސެންޓަރުގައި މިއަދު ބޭއްވި ޖުމްހޫރީ ދުވަހުގެ ރަސްމީ ޖަލްސާގައެވެ.
ޢަލީ އަކުރަމަށް މި އިނާމު ރައީސުލްޖުމްހޫރިއްޔާ ދެއްވީ، ވިލާ ކޮލެޖުން 2024ވަނަ އަހަރު މާސްޓަރ އޮފް ސައެންސް އިން ޕްރޮޖެކްޓް މެނޭޖްމަންޓް ކޯސް ފުރިހަމަކުރައްވައި، އެންމެ މަތީ ދަރަޖައިގައި ފާސްވެ، އެ ކޯހުން 1ވަނަ ހޯއްދަވައި، “ޤާސިމް އިބްރާހީމް އެވޯޑް ފޯރ އެކްސެލެންސް” ޙާޞިލްކުރައްވައިފައި ވާތީއެވެ.
ފާޠިމަތު މުފާޒާއަށް މި އިނާމު ރައީސުލްޖުމްހޫރިއްޔާ ދެއްވީ، އެވިޑް ކޮލިޖުން 2024ވަނަ އަހަރު، ބެޗްލަރ އޮފް ޝަރީޢާ އެންޑް ލޯ ކޯސް ފުރިހަމަކުރައްވައި، އެންމެ މަތީ ދަރަޖައިގައި ފާސްވެ، އެ ކޯހުން 1ވަނަ ޙާޞިލްކުރައްވައިފައި ވާތީއެވެ.
މުފާޒާއާއި، ޢަލީ އަކުރަމުގެ މި ކާމިޔާބުން ކެލައަށް ލިބިގެން ދިޔަ ރީތި ނަމަށް ޓަކައި، ތިލައުތުރު ނޫހުން ތަހުނިޔާ ދަންނަވަމެވެ. އިތުރު ކާމިޔާބަށް އެދެމެވެ.
