ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒްގެ ރިޔާސީ ވަޢުދުފުޅުގެ ތެރޭގައި ވިދާޅުވި ގޮތަށް ކެލާގެ ދަނޑުބިމަށް ކަރަންޓްލުމުގެ ޢަމަލީ މަސައްކަތް ފެށިއްޖެއެވެ.
ޒަމާނުންސުރެ ކެލާއަކީ ދަނޑުވެރި ރައްޔިތަކު ދިރިއުޅޭ ދަނޑުވެރި ރަށެކެވެ. އެ މަސައްކަތުން ރަނގަޅު ނަފާއެއް ހޯދާ ބަޔަކު އަބަދުވެސް ކެލާގައި ދިރިއުޅެއެވެ. މާލެއާ 190 ވަރަކަށް މޭލު ދުރުގައި ދިރިއުޅެން ޖެހުމުގެ ސަބަބުން ކެލާގެ ދަނޑުވެރިންގެ އުފެއްދުންތައް ގިނަ ޢަދަދަކަށް މާލޭގެ ބާޒާރާ ހިސާބަށް ނުފޯރިއަސް ކެލާގެ އުފެއްދުންތަކަކީ އަދި އެ އުފެއްދުންތަކުގެ ރަހައަކީ މާލެއާ ކައިރި ހިސާބުތަކުން ލިބޭ އާންމު އުފެއްދުންތަކަށް ވުރެ މީރު ރަހަ ލިބޭ އުފެއްދުމެކެވެ.
ކެލާގެ ބިމަކީ ނުވަތަ ފަސްގަނޑަކީ ދަނޑުވެރިކަމުގައި ރާއްޖޭގެ އެންމެ ރަނގަޅު ކަމަށް ފާހަގަކުރެވިފައިވާ މަދު ރަށްރަށުގެ ފަސްގަނޑުގެ ތެރެއިން ފަސްގަނޑެކެވެ. ނަތީޖާއެއްގެ ގޮތުން ބާޒާރުން މިއަދުވެސް ގަންނަން ލިބޭ އެންމެ އަގު ބޮޑު އޮޅުއަލަކީ ކެލާ އޮޅުއަލަކަން ފާހަގަކޮށްލަން ޖެހެއެވެ.
ކެލާގެ ދަނޑުބިމަށް ކަރަންޓް ލުމަކީ ކެލާގެ ދަނޑުވެރިން ކުރަމުންދާ މަސައްކަތަށް އެތައް ފަސޭހަތަކެއް ލިބިގެންދާނެ ކަމެކެވެ. ގަސްހެއްދުމަށް އިތުރު ފަހިކަން އަންނާނެ ކަމެކެވެ. އޭގެ ސަބަބުން ބާޒާރަށް ނެރެވޭ ތަކެތީގެ ޢަދަދު އިތުރުވެ ގިނަ ބާވަތް އުފެއްދުމަށް ފުރުޞަތު ލިބޭނެ ކަމެކެވެ. މިހާރު ވެސް ކެލާއަކީ ދަނޑުވެރިކަމުގެ އެންމެ ގިނަ ވެރައިޓީތައް އެއް ރަށަކުން ރާއްޖޭން ލިބޭނެ ރަށެވެ.
ޑޮކްޓަރ މުޙައްމަދު މުޢިއްޒުގެ ވަޢުދުފުޅުތައް ޙަޤީޤަތަކަށް ވަމުންދާތަން ފެންނަމުން ދިޔުމަކީ ކެލާގެ ރައްޔިތުން އެ ކަމަށް ޓަކައި ނުހަނު ބޮޑަށް އުފާކުރާ ކަމެކެވެ. ކައިރި ތާރީޚެއްގައި ކެލާގެ ފަޅުތެރޭގައި ހަދާ ރިސޯޓްތައް ފެނިގެން ދިޔުމަށް ވެސް އެ ރައްޔިތުން ތިބީ އެދިއެދިއެވެ.
