ކެލާ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އެދިލެއްވުމަކަށް، ފެޑޯ ޕްރައިވެޓް ލިމިޓެޑްގެ ފަރާތުން ހައްދަވައި ދެއްވި ކެލާ ޕިކްނިކް ޕާކު ހުޅުއްވައި ދެއްވައިފިއެވެ. މި ޕާކު ހުޅުއްވައި ދެއްވީ އެ ކަމަށް ޓަކައި އިއްޔެ ހަވީރު ބޭއްވި ޚާއްޞަ ރަސްމިއްޔާތުގައި ރައްޔިތުންގެ މަޖިލީހުގެ ކެލާ ދާއިރާގެ ޢިއްޒަތްތެރި މެންބަރ އަލްފާޟިލް ޢަބްދުﷲ ޝަރީފެވެ.
އެއްފަހަރާ 10 ގްރޫޕަށް ކައްކާ ކެވޭ ގޮތަށް 10 ހަޓާއެކު، ބައެއް ޚިދުމަތްތައް ލިބޭ ގޮތަށް ހުޅުވި މި ޕާކުގައި ނަމާދުކުރާ ބަޔާއި، އަންހެނުންނާއި، ފިރިހެނުންނަށް ވަކިން ފާޚާނާއާއި، ބުއްދޭ ކުދިން ގެންގުޅޭ މީހުންނަށް އެ ޚިދުމަތް ދެވޭނެ ކޮޓަރިއަކާއި، ސެކިއުރިޓީންނަށް ޚާއްޞަ ކޮޓަރިއެއް ވެސް ހުރެއެވެ.
ފެންވެރޭނެ އިންތިޒާމާއި، ވުޟޫކުރާނެ އިސްކޫރު ބަރިވެސް ހިމެނޭ މި ޕިކްނިކް ޕާކު ހުޅުއްވުމަށް ބޭއްވި ރަސްމިއްޔާތުގައި ފެޑޯ ޕްރައިވެޓް ލިމިޓެޑްގެ ޝެއަރ ހޯލްޑަރ ކަމުގައިވާ ހއ. ކެލާ ބުލޫހެވަން އަޙްމަދު ފަޔާޒާއި، ކެލާ ކައުންސިލްގެ ރައީސާއި، ކައުންސިލްގެ މެންބަރުންނާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ރައީސާއާއި، އެ ކޮމިޓީގެ މެންބަރުންނާއި، ރަށުގެ މުއައްސަސާތަކުގެ ވެރިންނާއި، ގިނަ ޢަދަދެއްގެ އާންމު ރައްޔިތުން ބައިވެރިވެ ލެއްވިއެވެ.
އިއްއެ ހަވީރު ޕިކްނިކް ޕާކުގައި ބޭއްވި މި ރަސްމިއްޔާތުގައި ޒަމާނީ ފެންވަރަށް ޕެޑޯ ޕްރައިވެޓް ލިމިޓެޑްގެ އަމިއްލަ ޚަރަދުގައި މި ޕާކު ހައްދަވައި ދެއްވައިފައި ވާތީ، އެ ކަމުގެ އަގުވަޒަންކޮށް ހަނދާނީ ފިލައެއް ފެޑޯ ޕްރައިވެޓް ލިމިޓެޑަށް ވަނީ އަރުވާފައެވެ. ކެލާ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ފަރާތުން އެރުވި މި ފިލައާ ޙަވާލުވީ ފެޑޯގެ ޝެއަރ ހޯލްޑަރ އަޙްމަދު ފަޔާޒެވެ.
މި ޕާކު ބޭނުންކުރާނެ ގޮތުގެ އުޞޫލެއް އަދި ހަމަޖެހިފައި ނެތަސް އެ ފަދަ އުޞޫލެއް އެކުލަވައިލުމުގެ މަސައްކަތް ކައުންސިލާ ގުޅިގެން ވަރަށް އަވަހަށް ހަމަޖެހިގެންދާނެ ކަމަށް ކޮމިޓީގެ ރައީސާ ޙައްވާ ފަޒުނާ ވިދާޅުވިއެވެ. މި ރަސްމިއްޔާތަށް ފަހު ރަށުގެ ކުދި ބޮޑު އެންމެން ވެސް ބައިވެރިކޮށްގެން ބޭއްވި ޚާއްޞަ ބާބަކިޔުއެއް ޕިކްނިކް ޕާކުގައި އޮތެވެ.
