މިހާރު ހއ. މުރައިދޫގައި ހިނގަމުން އަންނަ ތިލައުތުރު ވޮލީ މުބާރާތް 2024 ގެ ގުރޫޕް ސްޓޭޖުގެ ފަހު މެޗުން މުބާރާތް ބާއްވާ ރަށް ކަމުގައިވާ މުރައިދޫ އަތުން ސީދާ 3 ސެޓުން ބަލިވެ ތިލައުތުރު ވޮލީ މުބާރާތަށް، މި އަހަރަށް ކެލާ އަލްވަދާޢު ކިޔައިފިއެވެ.
މޫސުން ގޯސްވުމުގެ ސަބަބުން ރޭ ނުކުޅެވުނު މި މެޗު، މިއަދު ހަވީރު 4.00 ގައި ވަނީ ކުޅެފައެވެ. މުރައިދޫއާއި، ކެލާ ބައްދަލުކުރި މި މެޗް ފުރަތަމަ ސެޓް މުރައިދޫ ކާމިޔާބުކުރީ 25 ޕޮއިންޓް 3 ޕޮއިންޓްންނެވެ. ދެ ވަނަ ސެޓް ގެންދިޔައީ 25 ޕޮއިންޓް 9 ޕޮއިންޓްންނެވެ. އަދި ތިން ވަނަ ސެޓް ގެންދިޔައީ 25 ޕޮއިންޓް 23 ޕޮއިންޓްންނެވެ.
ކެލާއާއި، މުރައިދޫ ބައްދަލުކުރި މެޗްގެ ކުއީން އޮފް ދަ މެޗަކަށް ހޮވުނީ މުރައިދޫ ޓީމުގެ ޖަރޒީ ނަންބަރ 17 ފާޠިމަތު ސަމާއެވެ.
ތިލައުތުރު ވޮލީ މުބާރާތުގެ ފުރަތަމަ ސެމީ ފައިނަލް މެޗްގެ ކުޅުން މާދަމާ ހަވީރު 4.00 ގައި އޮންނާނެއެވެ. ފުރަތަމަ ސެމީގައި ބައްދަލުކުރާނީ ދެ ގްރޫޕުގެ 1 ވަނަ ޓިމެވެ. އެއީ ގުރޫޕް 1 ގެ އެއް ވަނަ ޓީމަކީ މުރައިދޫއެވެ. ގްރޫޕު 2 ގެ އެއް ވަނަ ޓީމަކީ އިހަވަންދޫއެވެ. މުބާރާތުގެ ޤަވާޢިދު ހަމަޖެހިފައިވާ ގޮތުން މި މެޗުން މޮޅުވާ ޓީމަށް ފައިނަލްގެ ޖާގައެއް ސީދާ ލިބިގެން ދާނެއެވެ. ބަލިވާ ޓީމަށް ފައިނަލްގެ ޖާގައެއް ލިބޭނީ މާދަމާރޭ 8.00 ގައި ކުޅޭ، ދެ ވަނަ ސެމީގައި ބައްދަލުކުރާ ބާރަށާއި، އުތީމު މެޗުން މޮޅުވާ ޓީމާ 3 ވަނަ ސެމީގައި ވާދަކޮށް މޮޅުވެވިގެންނެވެ. 3 ވަނަ ސެމީ ފައިނަލް އޮންނާނީ ހުކުރު ދުވަހު ހަވީރު 4.00 ގައެވެ.
ތިލަދުންމަތީ އުތުރުބުރީ އަތޮޅު ކައުންސިލުން އިންތިޒާމްކޮށްގެން ބާއްވާ ތިލައުތުރު ވޮލީ މުބާރާތް 2024 ގެ ފައިނަލް މެޗް ކުޅުމަށް ހަމަޖެހިފައި ވަނީ މި މަހުގެ 23 ވާ ހޮނިހިރު ދުވަހުގެ ރޭ 8.00 ގައެވެ. މި އަހަރުގެ މުބާރާތް ހޯސްޓްކުރަނީ މުރައިދޫއިންނެވެ.
