ތިލައުތުރު ވޮލީ މުބާރާތް 2024 ގައި މިރޭ ކުޅެން ފެށި ކެލާއާއި، މުރައިދޫ މެޗް، މޫސުން ގޯސްވުމުގެ ސަބަބުން ހުއްޓާލައިފިއެވެ.
މިރޭ 8.00 ގައި ކުޅެން ފެށި މެޗް ފުރަތަމަ ސެޓަށް ފަހު ނިންމާލީ ބޯކޮށް ވާރޭވެހި ކޯޓުގައި ފެންބޮޑުވުމުގެ ސަބަބުންމެވެ. މި މެޗް ވާރޭގެ ސަބަބުން މެދުކަނޑާލި އިރު 1 ސެޓް ވަނީ ކުޅެފައެވެ. އެ ސެޓް 25 ޕޮއިންޓް 10 ޕޮއިންޓުން ކާމިޔާބުކުރީ މުރައިދޫ ޓީމެވެ.
މޫސުން ގޯސްވުމުގެ ސަބަބުން މެދުކަނޑާލި މި މެޗް، އަލުން ކުޅުމަށް މިހާރު ތާވަލުކުރެވިފައި ވަނީ މާދަމާ ހަވީރު 4.00 ގައެވެ. ކެލާއަށް މުބާރާތުގައި އިތުރަށް ކުރިޔަށް ދެވޭކަން ކަށަވަރު ވާނީ މާދަމާ މުރައިދޫއާއެކު ކުޅޭ މެޗަށް ފަހުގައެވެ.
ކެލާ ހިމެނޭ ގްރޫޕުން މިހައި ތަނަށް ސެމީ ފައިނަލް ޔަޤީންވެފައި ވަނީ މުބާރާތް ބާއްވާ ރަށް ކަމުގައިވާ މުރައިދޫއަށް އެކަންޏެވެ. ގުރޫޕް 2 އިން ސެމީގެ ޖާގަ ލިބިފައި ވަނީ 6 ޕޮއިންޓާއެކު ގުރޫޕްގެ 1 ވަނަގައި އޮތް އިހަވަންދޫއަށާއި، 3 ޕޮއިންޓާއެކު އޮތް ބާރަށު ޓީމަށެވެ.
ތިލައުތުރު ވޮލީ މުބާރާތް 2024 އަކީ ތިލަދުންމަތީ އުތުރުބުރީ އަތޮޅު ކައުންސިލުން އިންތިޒާމުކޮށްގެން އަތޮޅުގެ ރަށްތަކަށް ހުޅުވައިލައިގެން ބާއްވަމުން އަންނަ މުބާރަތެކެވެ. މި އަހަރުގެ މުބާރާތުގައި އަތޮޅުގެ 7 ރަށަކުން ބައިވެރިވެފައި ވެއެވެ. މި އަހަރުގެ މުބާރާތް ހޯސްޓްކުރަނީ މުރައިދޫއިންނެވެ.
