މިހާރު ކެލާގައި ހިނގަމުންދާ، ކެލާ ސްޕޯރޓްސް ފިއެސްޓާ ވޮލީ މުބާރާތުގެ ފައިނަލަށް ފަސޭހަކަމާއެކު ފިއްލަދޫ ބަލިކޮށް ހަނިމާދޫ ދަތުރުކޮށްފިއެވެ.
ކެލާ ކައުންސިލުން އިންތިޒާމުކޮށްގެން ކެލާގައި މިހޖާރުކުރިއަށްދާ، ކެލާ ސްޕޯރޓްސް ފިއެސްޓާ ވޮލީ މުބާރާތުގެ ސެމީފައިނަލް ފުރަތަމަ މެޗުގައި އިއްޔެ ބައްދަލުކޮށް ފިއްލަދޫގެ މައްޗަށް ހަނިމާދޫ ކުރި ހޯދީ ސީދާ 3 ސެޓުން ފިއްލަދޫ ބަލިކުރުމަށް ފަހުގައެވެ.
ފޯރިގަދަ އަދި ރީތި ކުޅުމެއް ފެނިގެން ދިޔަ އިއްޔެ މެޗުތައް ހަނިމާދޫން ކާމިޔާބުކުރީ ފުރަތަމަ ސެޓު 25-16 އިންނެވެ. ދެވަނަ ހަނިމާދޫ ހޯދީ 25-17 އިންނެވެ. ފަހު ސެޓް ހަނިމާދު އަތުލީ 25-20 އިންނެވެ. އިއްޔެގެ މެޗުގެ މޮޅު ކުޅުންތެރިއަކަށް ހޮވުނީ ހަނިމާދޫ ސާއްބަ އެކުވެރި ކުލަބުގެ ޝުޢައިބު ޢަބްދުއްލަޠީފެވެ.
ސެމީ ފައިނަލްގެ ދެ ވަނަ މެޗުގެ ކުޅުން މިއަދު ހަވީރު އޮންނާނެއެވެ. ދެ ވަނަ ސެމީގައި ބައްދަލުކުރަނީ މުބާރާތް ބާއްވާ ރަށް ކަމުގައިވާ ކެލައާއި، ހޯރަފުއްޓެވެ. ހޯރަފުށި ސެމީ ފައިނަލުން ޖާގަ ހޯދީ އޭ ގޫރޫޕުގެ ދެ ވަނަ ޓީމުގެ ގޮތުގައެވެ. ކެލާ ޖާގަ ހޯދީ ބީ ގުރޫޕުގެ އެއް ވަނަ ޓީމުގެ ގޮތުގައެވެ.
މިއީ ކެލާ ކައުންސިލުން އިންތިޒާމުކޮށްގެން ކުރިއަށް ގެންދާ ފުރަތަމަ ސްޕޯރޓްސް ފިއެސްޓާއެވެ. މި ފިއެސްޓާގެ ސަބަބުން ކުޅިވަރުގެ އައު ރޫޙެއް އުފެދި ހުނަރުވެރި ކުޅުންތެރިން އުފެދުމަށް ހިތްވަރުލިބިގެންދާނެއެވެ.
