ސަރުކާރުގެ އޮފީސްތަކާއި، ކުންފުނި އަދި އަމިއްލަ އެކިއެކި މުއައްސަސާތަކުން ޚިދުމަތް ހޯދުމަށް އޮންލައިންކޮށް ހުށަހަޅަން ޖެހޭ ފޯމުތައް ފުރައިދީ، ސިޓީބިޓީ ފަދަ ލިޔުންތައް ލިޔެދީ ރައްޔިތުންގެ ހުރި ކަންބޮޑުވުންތައް ޙައްލުކޮށްދިނުމަށް، ތިލަދުންމަތީ އުތުރުބުރީ ކެލާ ކައުންސިލުން ހެލްޕް ޑެސްކެއް ޤާއިމްކޮށް، ޚާއްޞަ ފޯން ނަންބަރެއް ހަމަޖައްސައިފިއެވެ.
މި ކަމާ ގުޅޭ ގޮތުން ކެލާ ކައުންސިލުން ކުރެއްވި ފޭސްބުކް ޕޯސްޓްގައިވާ ގޮތުގައި، މި ޑެސްކުން ރައްޔިތުންނަށް ފޯރުކޮށްދޭ ޚިދުމަތްތަކުގެ ތެރޭގައި އެ ފަދަ ރަސްމީ ޑޮކިޔުމަންޓްތައް ލިޔެ، ތައްޔާރުކޮށްދިނުމުގެ އިތުރުން، ޕޯޓަލް މެދުވެރިކޮށް އެ ފަދަ ޑޮކިޔުމަންޓްތައް ފޮނުވައިދިނުމުގެ ޚިދުމަތް ވެސް ފޯރުކޮށްދޭ ގޮތަށް ވަނީ ހަމަޖައްސައިފައެވެ.
ލާމަރުކަޒީ ނިޒާމު އިތުރަށް ހަރުދަނާކޮށް ރައްޔިތުންނާ ގާތުން ޚިދުމަތް ލިބޭނެ ގޮތް ފަހިކޮށް ދެއްވުމަކީ ރައީސް ޑޮކްޓަރ މުޙައްމަދު މުޢިއްޒު، ޚާއްޞަ އިސްކަމެއް ދެއްވައިގެން މި ސަރުކާރުން ކުރައްވަމުން އަންނަ ކަމެކެވެ.
އެ ޚިދުމަތްތައް ގާތުން ލިބިގަތުން ފަހިކޮށް ދެއްވުމަށް ޓަކައި، ކެލާ ކައުންސިލުން ހެލްޕް ޑެސްކެއް ޤާއިމުކުރުމަކީ ކެލާ ރައްޔިތުންނަށް ލިބުނު ވަރަށް ބޮޑު ހިތްހަމަޖެހުމެކެވެ. އަދިހަމަ އެހައިމެ ބޮޑު ލުއި ފަސޭހައެކެވެ.
