ކުޅިވަރާ ހަށިހެޔޮކަމާ ބެހޭ ވުޒާރާއާއި، މޯލްޑިވްސް ނެޝަނަލް އިންސްޓިޓިއުޓް އޮފް ސްޕޯރޓްސްއާއި، ހޭންޑް ބޯލް އެސޯސިއޭޝަނާ ގުޅިގެން ކެލާ ޔޫތު ފޯރަމުން ހިންގާ ބޭސިކް ހޭންޑް ބޯލް ކޯޗިންގ ކޯހެއް ކެލާގައި ފައްޓައިފިއެވެ.
މި މަހުގެ 6 ވަނަ ދުވަހު ފެށުނު މި ބޭސިކް ހޭންޑް ބޯލް ކޯޗިންގ ކޯސް، މި ހިނގާ އޮކްޓޯބަރ މަހުގެ 16 ގެ ނިއަލަށް ކުރިޔަށް ދާނެއެވެ. މި ކޯހުގައި ކެލާ، ދިއްދޫ، ފިއްލަދޫ، ބާރަށް އަދި އިހަވަންދޫއިން 31 މީހަކު ބައިވެރިވެފައި ވެއެވެ. ދިހަ ދުވަހުގެ މުއްދަތަށް ކެލާގައި ކުރިޔަށްދާ މި ކޯހުގައި ކިޔަވައިދެއްވަނީ ހޭންޑް ބޯލްގެ ތަމްރީނު ލިބިފައިވާ ރާއްޖޭގެ ހުނަރުވެރި އިންސްޓްރަކްޓަރުންނެވެ.
ހޭންޑް ބޯލްގެ ހުނަރުވެރި ކުޅުންތެރިން އުފެއްދުމުގެ ގްރާސް ރޫޓް މަސައްކަތްތަކެއް މިހާރުވެސް ހިންގަމުންދާ ކެލާގައި ކުރިޔަށް ގެންދާ މި ކޯހުގެ ސަބަބުން ހއ. އަތޮޅުގައި ހޭންޑް ބޯލްގެ ޙަރަކާތްތައް މިހާރަށް ވުރެ އިތުރަށް ފުޅައިވެގެން ދާނެއެވެ. މިއީ ކެލާގައި ހިންގާ މި ފަދަ ފުރަތަމަ ކޯހަށް ވިއަސް، ކައިރި ތާރީޚެއްގައި ހޭންޑް ބޯލް ކޯޗިންގ ސެޓްފިކެޓް ލެވެލްގެ ކޯސްތައް މޯލްޑިވްސް ނެޝަނަލް އިންސްޓިޓިއުޓް އޮފް ސްޕޯރޓްސްއާއި ގުޅިގެން ކުރިއަށް ގެންދިޔުމަށް ކެލާ ޔޫތު ފޯރަމުން މިހާރު ވެސް އަންނަނީ ވިސްނަމުންނެވެ.
