ކެލާ ޝައިޚް އިބްރާހީމް ސުކޫލުގެ ހައުސްތަކުގެ މެދުގައި ބާއްވާ ފުޓުބޯޅަ މުބާރާތާއި، ހޭންޑް ބޯލް މުބާރާތުގައި އިއްޔެ ހަވީރު ކުޅުނު ސީނިއަރ ހޭންޑް ބޯލް މެޗް ޔާގޫތު މޮޅުވެ، ޖޫނިއަރ ފުޓުބޯޅަ މެޗް ފީރޯޒު ހައުސް ކާމިޔާބުކޮށްފިއެވެ
މި މަހުގެ 25 ވަނަ ދުވަހު ފެށިގެން ހިނގަމުންދާ މި މުބާރާތްތަކުގައި ސީނިއަރ ހޭންޑް ބޯލްގައި ޔާގޫތު ހައުސްއާއި، އަލިމަސް ހައުސް ބައްދަލުކުރި މެޗް 6 ލަނޑު 5 ލަނޑުން ކާމިޔާބުކުރީ ޔާގޫތު ހައުސްއެވެ. ސުކޫލުގެ ލީޑިން ޓީޗަރ ފާޠިމަތު ނަޖުދާ ޝަރަފުވެރިކޮށްދެއްވި މެ މެޗްގެ މޮޅު ކުޅުންތެރިއަކަށް ހޮވުނީ ޔާގޫތު ހައުސްގެ އާމިނަތު ނައުހާއެވެ.
ޕީޓީއޭގެ މެންބަރ މުޞްޠަފާ ޙަސަން ޝަރަފުވެރިކޮށްދެއްވި ޖޫނިއަރ ފުޓުބޯޅަ މުބާރާތުގެ އިއްޔެގެ މެޗް 3 ލަނޑު 1 ލަނޑުން ކާމިޔާބުކުރީ ޔާގޫތު ހައުސްއާ ބައްދަލުކޮށް ފީރޯޒު ހައުސްއެވެ. މޮޅު ކުޅުންތެރިއަކަށް ހޮވުނީ ފީރޯޒު ހައުސްގެ ޔުނާން މުޙައްމަދު ޝިފާޢުއެވެ.
“ތިލަ އުތުރު” އަށް މަޢުލުމާތު ލިބިފައިވާ ގޮތުގައި، ސުކޫލުގެ ކުޅޭ ބިމުގައި ކުރިޔަށްދާ މި މުބާރާތްތަކަށް ބެލެނިވެރިންނާއި، ދަރިވަރުންގެ ފަރާތުން ފުރިހަމަ ސަޕޯރޓް އަންނަނީ ލިބެމުންނެވެ. ކުޅިވަރުގެ ރޫޙް ދިރުވާ އާލާކޮށް، ވާދަވެރި މާޙައުލެއްގައި ކުޅިވަރު ކުޅުމުގެ ފުރުޞަތު ފަހިކޮށްދެއްވުމުގެ މަޤްޞަދުގައި ޝައިޚް އިބްރާހީމް ސުކޫލުން ބާއްވާ މި މުބާރާތްތަކުގައި މިއަދު ހަވީރު ވެސް 2 މެޗެއް ކުޅުމަށް ވަނީ ތާވަލުކޮށްފައެވެ.
