ލޭ ހަދިޔާކުރުމަކީ ދިގުދެމިގެންދާ ޞަދަޤާތެއް ކަމަށް އިއްޔެގެ ހުކުރު ޚުޠުބާގައި ހާމަކުރައްވައިފިއެވެ. މި ކަން ހާމަކުރެއްވީ ” ލޭ ހަދިޔާކުރުމަކީ ޞަދަޤާތެއް!” މި މަޢުޟޫއަށް އިއްޔެ މިސްކިތްތަކުގައި އިއްވި ހުކުރު ޚުޠުބާގައެވެ.
ޚުތުބާގައި ޙާމަކުރެއްވި ގޮތުގައި ހެޔޮ ޢަމަލުކުރުމުގެ މަގުތައް ވަނީ އިންސާނުންނަށް ތަނަވަސްކޮށް ދެއްވާފައެވެ. މާތް اللهގެ އަޅުތަކުންނަށް އެހީތެރިވުމާއި، ފައިސާއާއި، މުދަލުން ހޭދަކުރުމާއި، ޞަދަޤާތްކުރުމަކީ، ދަރުމަހުރި ކަންކަމެވެ. އެންމެ ކުޑަމިނުން އުފާވެރި މޫނަކައިގެން މީހުންނާ ބައްދަލުކޮށް، ހެޔޮ ބަހެއް ބުނުމީ ވެސް ކުރެވޭ ޞަދަޤާތެކެވެ. ހެޔޮ ޢަމަލުތަކުގެ ސަވާބު އެތައް ގުނައަކަށް އިތުރުވެގެންވާ ޞަދަޤާތުގެ ތެރޭގައި މީހެއްގެ ފުރާނަ ސަލާމަތްކުރުމަށްޓަކައި އަމިއްލަ ހަށިގަނޑުގައި ހުރި ލޭ ހަދިޔާކުރުމަކީ އިންސާނިއްޔަތަށް ޓަކައި ކުރެވޭ އެންމެ މަތިވެރި އެއް ޞަދަޤާތެވެ.
އާދަކާދައިގެމަތިން މިއަދުވެސް ޚުޠުބާ ފައްޓަވާފައިވަނީ އެންމެހައި ޙަމްދު ޘަނާ ތަޢުރީފު ޙައްޤުވެގެންވަނީ މާތްﷲއަށް ކަމާއި، އެކަލާނގެ ރަސޫލާއަށް ޞަލަވާތާއި ސަލާމް ލެއްވުން އެދި ދުޢާކުރަމުންނެވެ. އަދި އެ ޞަލަވާތާއި ސަލާމުގައި އެ މާތް ރަސޫލާގެ އާލު އަޞްޙާބުންނާއި ހެޔޮގޮތުގައި ތަބަޢަވީ އެންމެން ޝާމިލް ކޮށްފައި ވެއެވެ. ހަމައެހެންމެ މާތްﷲއަށް ތަޤުވާގެރިވުމަށާއި މާތްﷲ ފިޔަވާ ޙައްޤުވެގެން އަޅުކަންކުރެވޭ އެހެންފަތާރެއް ނުވާކަމަށާއި އެކަލާނގެއަށް ޝަރީކުނުކުރުމަށް ހުރިހާ މުސްލިމުންނަށް ހަނދާންކޮށްދެއްވާފައި ވެއެވެ.
އިއްޔެ އިއްވި ޚުޠުބާގައި ހާމަކުރެއްވި ގޮތުގައި ތިމާއަށް ކޮށްލެވޭ މި ފަދަ ހޭދަތަކުގެ ސަބަބުން ނިޢުމަތްތަކުން ފުރިގެންވާ ސުވަރުގެ ވަނުމުގެ ނަޞީބު ލިބޭ ފަދައިން ސުވަރުގޭގެ ނިޢުމަތްތަކަކީ، މާތް ﷲގެ އަޅާ އުފަލުން ފޮޅޭ ވަރުގެ މަތިވެރި ނިޢުމަތްތަކެއް ކަމަށް ވެސް ޚުތުބާގައި ހާމަކުރެއްވިއެވެ. އަދި މާތް اللهގެ އަޅުތަކުންނަށް ޖެހޭ ބޭނުންތައް ފުއްދައިދީ، ބޮޑެތި ކަންކަމުގައި މިއަދު އެހީތެރިވުމަކީ، އާޚިރަތް ދުވަހުން އުފުލަންޖެހޭ ބޮޑެތި މުޞީބާތްތަކުން ދިންނަވާނޭ ކަމެއް ކަމަށް ވެސް ޚުތުބާގައި ހާމަކުރެއްވިއެވެ. އަދިހަމައެހެންމެ ކޮންމެ މުސްލިމަކު ވެސް މިއަދު އަވަސްވެގަންނާންވީ އެ ދުވަހުގެ ބިރުވެރިކަމާއި، އަޒާބުން މިންޖުވާނޭ އަމަލެއް ކުރެވޭތޯ ކަމަށް ޚުތުބާގައި ހާމަކުރެއްވިއެވެ.
އިއްޔެ އިއްވި ޚުޠުބާގައި ދިގުދެމިގެންދާ ޞަދަޤާތްތަކަކީ ކޮބައިކަން ވެސް ހާމަކޮށްދެއްވައިފައި ވެއެވެ. އެ ގޮތުން އިންސާނާ މަރުވުމަށްފަހު، އޭނާއަށް ސަވާބު ލިބޭނެ ތިން ކަމެއްގެ ވާހަކަ ނަބިއްޔާ ﷺ ވަނީ ބަޔާންކޮށްދެއްވާފައިވާ ކަމަށް ހާމަކުރެއްވިއެވެ. އެއީ ދެމިގެންވާ ޞަދަޤާތަކާއި، ފައިދާކުރަނިވި ޢިލްމަކާއި، އޭނާއަށްޓަކައި ހެޔޮ ދުޢާކުރާނެ ޞާލިޙު ދަރިއެކެވެ. އެހެންކަމުން މީހަކު ހަދިޔާކުރި ލޭގެ ސަބަބުން ބަލިމީހެއްގެ ފުރާނަ ސަލާމަތްވެއްޖެނަމަ، އެމީހާ ދުނިޔޭގައި ދިރިހުރިހައި ހިނދަކު، ލޭ ހަދިޔާކުރި މީހާއަށް އޭގެ ސަވާބު ލިބިލިބި ހުންނާނެ ކަމަށް ޚުޠުބާގައި ހާމަކުރައްވާފައި ވެއެވެ.
“އެންމެ މީހެއްގެ ފުރާނަ ސަލާމަތްކޮށްދިނުމަކީ އެތައް ބަޔެއްގެ ފުރާނަ ސަލާމަތްކޮށްދިނުން. ވީމާ ދަރުމަހުރި، އިންސާނިއްޔަ މި ޢަމަލާއިގެން ކުރިއަށްދިއުމަށް ގޮވައިލަން. ޝަރުޢީ އަދި ޞިއްޙީ ހަމަތަކުގެ މަތީން ލޭ ހަދިޔާކުރުމަށް ޝަރުޠުހަމަވާ އެންމެން މި ކަމުގައި ބައިވެރިވޭ. ލޭހަދިޔާކުރުމަކީ ދެމިގެންވާ ޞަދަޤާތެއްކަމުގައި ޢިލްމުވެރީން ދެކެވަޑައިގަނޭ. އެއީ އިންސާނާ މަރުވުމަށް ފަހުގައި ވެސް، އެ ޞަދަޤާތެއްގެ ހެޔޮ އަސަރު ދެމިހުރިހައި ހިނދަކު، ޞަދަޤާތްކުރި މީހާއަށް ސަވާބު ލިބިލިބި ހުންނާނޭ ކަމެއް,” ޚުތުބާގައި ހާމަކުރެއްވިއެވެ.
ޚުޠުބާ ނިންމަވާލައްވާފައިވަނީ މި ޤައުމަށާއި ޤައުމުގެ ކަންކަމަށް ރަނގަޅުގޮތްވުމަށް އެދި ދުޢާކުރަމުންނެވެ. ޤައުމުގެ ކަންކަން އިސްލާމްދީނާއެއްގޮތަށް ގެންދިއުމަށް މަސައްކަތްކުރައްވާ ވެރީންނަށް ހެޔޮގޮތްވުމަށް އެދެމުންނެވެ. ބަލިމީހުންނަށް ޝިފާދެއްވާ ފުރިހަމަ ޞިއްޙަތާއި ޢާފިޔަތުގެ ނިޢުމަތް މިންވަރު ކުރެއްވުމަށް އެދެމުންނެވެ.
