މިހާރު ކުރިއަށްދާ ގޯލްޑަން ފުޓްސަލް ޓޯނަމަންޓްގެ ޒޯން 1ގެ ފައިނަލް މެޗު ފަސޭހަކަމާއެކު މާރަންދޫ ބަލިކޮށް ޗެމްޕިއަންކަން ނާވައިދޫ ހޯދައިފިއެވެ.
ހުޅުމާލޭ ރެހެންދި ފުޓްސަލް ދަނޑުގައި ރޭ ކުޅުނު ފައިނަލް މެޗު ނާއިދޫއިން ކާމިޔާބުކުރީ 6-1އިން މާރަންދޫ ބަލިކޮށެވެ. މި މެޗުގައި ނާވައިދޫން ލަނޑުޖެހީ ޢަބްދުﷲ ވިސާމް 3 ލަނޑު، ޔާމިން މުޙައްމަދު 1 ލަނޑު، މުޙައްމަދު އަސްލަމް 1 ލަނޑު އަދި ޢަބްދުﷲ ޝާފިޢު 1 ލަނޑެވެ. މާރަންދޫއިން ޖެހި ހަމައެކަނި ލަނޑު ކާމިޔާބުކޮށްދިނީ ޙަސަން އަސްލަމެވެ. ފައިނަލް މެޗުގެ މޮޅު ކުޅުންތެރިއަކަށް ހޮވުނީ ނާވައިދޫއަށް 3 ލަނޑުޖަހައިދިން ޖަރޒީ ނަންބަރު 29 ޢަބްދުﷲ ވިސާމެވެ.
މުބާރާތް ނިމުމުން ރޭ ވަނީ ތަފާތު ވަނަތައް ހޯދި ކުޅުންތެރިންނަށާއި، ޗެމްޕިއަން ޓީމަށް ތައްޓާއި، މެޑަލްދީފައެވެ. މުބާރާތުގެ ޓޮޕް ސްކޯރާ ނުވަތަ އެންމެ ގިނަ ލަނޑުޖެހި ކުޅުންތެރިއަކަށް ހޮވުނީ ނާވައިދޫ ޓީމުގެ ޖަރޒީ ނަންބަރު 29 ޢަބްދުﷲ ވިސާމެވެ. އަދި މުބާރާތުގެ ބެސްޓް ޕްލެއަރ ނުވަތަ އެންމެ މޮޅު ކުޅުންތެރިއަކަށް ހޮވުނީ ވެސް ޢަބްދުﷲ ވިސާމެވެ. ޗެމްޕިއަންޓީމަކީ ނާވައިދޫއެވެ. ރަނަރއަޕް ޓީމަކީ މާރަންދޫއެވެ.
މި މުބާރާތަކީ ހުނަރުވެރި ކުޅުންތެރިންގެ ހުނަރުތައް ދައްކާލުމުގެ ފުރުޞަތު ފަހިކޮށްދޭ މުބާރާތެކެވެ. ޚާއްޞަކޮށް މި މުބާރާތުގެ ސަބަބުން ހުނަރުވެރި މޮޅު ކުުޅުންތެރިން އުފެދެމުންދާކަން ނުހަނު އުފަލާއެކު ފާހަގަކުރަމެވެ. އިޖުތިމާޢީ ގުޅުންތައް އުފައްދައިދިނުމުގައި ގޯލްޑަން ފުޓްސަލް މުބާރާތް އަދާކުރަމުން ދަނީ މުހިންމު ދައުރެކެވެ.
