ގޯލްޑަން ފުޓްސަލްގައި މި އަހަރު، ކެލާ ކުޅޭ އެންމެ ފަހު މެޗު މިރޭ ނޮޅިވަރަންފަރާއެކު ކުޅޭނެއެވެ. މިރޭ 10.00ގައި ކުޅޭ މި މެޗުން މޮޅުވެގެން ވެސް މުބާރާތުގައި ކުރިއަށް ދިޔުމުގެ ދޮރު ކެލައަށް ވަނީ ބަންދުވެފައެވެ.
ލިމިޓެޑް ކުޅުންތެރިން ކޮޅަކާއެކު މި މުބާރާތުގައި ވާދަކުރާ ކެލާ ޓިމާ، އިދިކޮޅަށް މިރޭ ނުކުންނަ ނޮޅިވަރަންފަރަށް ކެލާ މެޗު ކާމިޔާބުކޮށް ކުރިއަށް ދިޔުމުގެ ދޮރު ތަނަވަސްކޮށް ހުޅުވިފައި އެބަ އޮތެވެ. މިހާތަނަށް އައި އިރު ނޮޅިވަރަންފަރަށް ވަނީ 2 ޕޮއިންޓް ލިބިފައެވެ. މިރޭގެ މެޗުން މޮޅުވެއްޖެ ނަމަ 5 ޕޮއިންޓް ލިބި، ފައިނަލަށް ދަތުރުކުރުމުގެ ފުރުޞަތު ނޮޅިވަރަންފަރަށް ލިބުމަކީ އެކަށީގެންވާ ކަމެކެވެ.
ނޮޅިވަރަށްފަރު ވަނީ ޒޯނުގައި ކުޅުނު 2 މެޗުން ވެސް ބައެއްގެ އަތްދަށުނުވެ ސަލާމަތްވެފައެވެ. ފުރަތަމަ މެޗު މާރަންދޫއާ ކުޅެ އެއްވަރުވީ 1-1އިންނެވެ. ދެ ވަނަ މެޗުގައި ނާވައިދޫއާ ކުޅެ އެއްވަރުވީ ވެސް 1-1އިންނެވެ.
މި ގުރޫޕުގެ އަނެއް މެޗުގައި ބައްދަލުކުރާނީ ނާވައިދޫއާއި، މާރާންދޫއެވެ. ލިބިފައިވާ ޕޮއިންޓަށް ބަލާ އިރު ޓޭބަލުގެ އެންމެ ކުރީގައި އޮތީ މި ދެ ރަށެވެ. މި ދެ ޓީމަށް މިރޭގެ މެޗު ޑްރޯކޮށްލައިގެން ފައިނަލުގައި ކުޅުމުގެ ޗާންސު ބޮޑުކޮށް އެބަ އޮތެވެ. 4 ޕޮއިންޓާ ފައިދާ 1 ގޯލު މި ދެ ޓީމަށް ލިބިފައި ވެއެވެ. މި ދެ ޓީމުންކުރެ ޓީމެއް ބަލިވެ، ކެލާގެ މައްޗަށް ނޮޅިވަރަންފަރު ގަދަވެއްޖެ ނަމަ ނޮޅިވަރަންފަރަށް ވެސް ފައިނަލުގެ ޖާގަ ލިބުން އެކަށީގެން ވެއެވެ.
މިރޭ 10.00ގައި ހުޅުމާލޭ ފުޓްސަލްދަނޑު ވަޠަނީ ލޯބިން ކައްކާލުމަށް، މި 4 ރަށަށް ނިސްބަތްވާ ސަޕޯޓަރުން ހާޒިރުވުމަކީ ކުޅުންތެރިންގެ ރޫޙު އިތުރުކޮށްދޭނެ ކަމެކެވެ. ތިލައުތުރު ނޫހުން ހުރިހާ ޓީމަކަށް ވެސް ކާމިޔާބަށް އެދެމެވެ. ހައްތާ ވެސް ތިއީ ބޮޑު ތިލަދުންމައްޗެވެ.
