ތަޢުލީމީ ދަރިންނަކީ ޤައުމާއި، އުންމަތުގެ އުންމީދު ކަމަށް މިއަދުގެ ހުކުރު ޚުޠުބާގައި ހާމަކުރައްވައިފިއެވެ. މި ކަން ހާމަކުރެއްވީ ”ވަށައިޖެހޭ ތަޢުލީމުގެ މަތީގައި އުންމަތް ބިނާކުރާށެވެ!” މި މަޢުޟޫއަށް މިއަދު މިސްކިތްތަކުގައި އިއްވި ހުކުރު ޚުޠުބާގައެވެ.
މިއީ ޅަދަރީންގެ މުސްތަޤުބަލު ބިނާކުރުމުގެ އައު ބާބެއްގެ ފެށުންކަމާއި ތަޢުލީމާއި ތަރުބިއްޔަތު ވާންޖެހޭނީ ކުދިންގެ ބުއްދިއާއި އަޚްލާޤަށް ފުރިހަމަކަން ގެނެސްދޭ އެއްޗަކަށް ކަމުގައި ބަޔާންކުރައްވާފައި ވެއެވެ. އަދި ކިޔަވާކުދިންގެ ހިތްތަކުގައި އީމާންކަމާއި މަތިވެރި އަޚްލާޤުގެ ބިންގާ އަޅައިދީ އެ ކުދިންގެ ހިތްތަކަށް ރޫޙާނީ ދިރުންގެނެސްދޭ ގޮތަށް ކިޔަވައިދިނުން ބައްޓަންކުރުމަށް ޚުޠުބާގައި ގޮވާލައްވާފައި ވެއެވެ.
އާދަކާދައިގެމަތިން މިއަދުވެސް ޚުޠުބާ ފައްޓަވާފައިވަނީ އެންމެހައި ޙަމްދު ޘަނާ ތަޢުރީފު ޙައްޤުވެގެންވަނީ މާތްﷲއަށް ކަމާއި، އެކަލާނގެ ރަސޫލާއަށް ޞަލަވާތާއި ސަލާމް ލެއްވުން އެދި ދުޢާކުރަމުންނެވެ. އަދި އެ ޞަލަވާތާއި ސަލާމުގައި އެ މާތް ރަސޫލާގެ އާލު އަޞްޙާބުންނާއި ހެޔޮގޮތުގައި ތަބަޢަވީ އެންމެން ޝާމިލް ކޮށްފައި ވެއެވެ. ހަމައެހެންމެ މާތްﷲއަށް ތަޤުވާގެރިވުމަށާއި މާތްﷲ ފިޔަވާ ޙައްޤުވެގެން އަޅުކަންކުރެވޭ އެހެންފަތާރެއް ނުވާކަމަށާއި އެކަލާނގެއަށް ޝަރީކުނުކުރުމަށް ހުރިހާ މުސްލިމުންނަށް ހަނދާންކޮށްދެއްވާފައި ވެއެވެ.
”ލޮބުވެތި ދަރިވަރުންނޭވެ! ތިޔައީ ޤައުމާއި އުންމަތުގެ އުންމީދެވެ. މިއަދު ތިޔަކުދީން މަދަރުސާއަށް ތިޔަ ދަނީ، މުޅި ޤައުމުގެ މުސްތަޤުބަލު ތިޔަކުދީންގެ ކޮނޑުގައި އުފުލައިގެންނެވެ.” މި ވަރުގަދަ ޢިބާރާތުން ކިޔަވާކުދިންނަށް ހިތްވަރު އައުކޮށްދެމުން، ޚުޠުބާގައި ފާހަގަކޮށްފައިވަނީ، އުނގަންނައިދޭ މުދައްރިސުންނަށް އިޙްތިރާމްކުރުމަށާއި މަދަރުސާގެ އުޞޫލުތަކަށް ޙުރުމަތްތެރިކޮށް ހިތުމާއެކު ވަގުތާއި މަސައްކަތްތައް ރާވާލާ ބޭކާރު ގޮތުގައި ވަގުތު ހޭދަނުކުރުމަށެވެ.
”ޢިލްމު ހޯދުމުގެ މަގެއްގައި ހިނގައިފި މީހަކަށް، ސުވަރުގެވަންނާނޭ މަގެއް މާތް ﷲ ފަހިކޮށްދެއްވާނެތެވެ.” އެހެންކަމުން ކުދިންނަށް ކުރިމަތިވާ ގޮންޖެހުންތަކަށް ކެތްތެރިވެ، ޢަޒުމާއެކު، ކުރިޔަށް ދިއުމަށާއި މާތް ﷲގެ ރަޙްމަތުން، ކޮންމެ އުނދަގުލަކަށް ފަހު ފަސޭހަކަމެއް ލައްވާފައިވާކަން ފާހަގަ ކުރައްވާފައި ވެއެވެ. ޢިލްމު ލިބިގެންވާ މީހުން ﷲ ދަރަޖަތަކަކަށް އުފުއްލަވާނެކަމާއި ޢިލްމު އުނގެނުމަށް އިސްލާމްދީނުގައި ދެއްވާފައިވާ އަހައްމިއްޔަތުކަމާއި އެކަމުން ލިބޭ ފައިދާތައް ޤުރްއާނާއި ސުންނަތުގެ އަލީގައި ބަޔާންކުރައްވާފައި ވެއެވެ. ޢިލްމާއި މަޢުރިފާގެ ނޫރުން ދަރިވަރުންގެ ހިތްތައް އަލިކޮށް ރޯޝަންކޮށްދޭ ދަންމަރުތަކަށް މުރައްދިސުންވުމަށް އިލްތިމާސްކޮށްފައި ވެއެވެ. އަދި ބެލެނިވެރިންނަކީ ދަރިންނަށް ކުރިމަތިވާ ތުރާތަކުން ދުރުކޮށްދޭ އައްޑަނަކަށް ވުމަށާއި ކުދިންނަށް ލިބޭ ކާމިޔާބީގައި ބައިވެރިވުމާއެކު ނާކާމިޔާބީގައި ހިތްވަރު ދިނުމަށް ބެލެނިވެރިންނަށް ޚުޠުބާގައި ނަސައިޙަތްތެރިވެފައި ވެއެވެ.
ޚުޠުބާ ނިންމަވާލައްވާފައިވަނީ މި ޤައުމަށާއި ޤައުމުގެ ކަންކަމަށް ރަނގަޅުގޮތްވުމަށް އެދި ދުޢާކުރަމުންނެވެ. ޤައުމުގެ ކަންކަން އިސްލާމްދީނާއެއްގޮތަށް ގެންދިއުމަށް މަސައްކަތްކުރައްވާ ވެރީންނަށް ހެޔޮގޮތްވުމަށް އެދެމުންނެވެ. ބަލިމީހުންނަށް ޝިފާދެއްވާ ފުރިހަމަ ޞިއްޙަތާއި ޢާފިޔަތުގެ ނިޢުމަތް މިންވަރު ކުރެއްވުމަށް އެދެމުންނެވެ.
