ކުރަމުން ދިޔަ މަސައްކަތާ މެދު ފެށުނީންސުރެ ހިތްހަމަނުޖެހުމުގެ ޝުޢޫރު ކެލާ ރައްޔިތުން ފާޅުކުރަމުން ދިޔަ، ކެލާ ޞިއްޙީ މަރުކަޒުގެ އައު ޢިމާރާތުގެ މަސައްކަތް “ފެޑޯ”އާ ޙަވާލުކޮށްފި ކަމަށް ތިލައުތުރު ނޫހަށް މަޢުލޫމާތު ލިބިއްޖެއެވެ.
ފެޑޯ ކޮމްޕެނީ ޕްރައިވެޓް ލިމިޓެޑާ މި މަސައްކަތް ޙަވާލުކޮށްފައި ވަނީ އެ ކަމަށް ޓަކައި ފިނޭންސް މިނިސްޓްރީން ހުޅުވާލި ބީލަން ކާމިޔާބު ކުރައްވައިގެންނެވެ. މަޢުލޫމާތު ލިބިފައިވާ ގޮތުގައި އެންމެ ކުޑަ އަގެއް މި ފަހަރު ވެސް ހުށަހެޅީ ފެޑޯއިންނެވެ.
ފެޑޯއާ މި މަސައްކަތް ޙަވާލުކުރި އިރު މި މަސައްކަތަކީ ކުރީ ސަރުކާރުން ކެލާގައި ކުރަންފެށި، ކެލާ ރައްޔިތުންގެ ފުރާނައާ އަދި ވިންދާ ގުޅިފައިވާ އެންމެ މުހިންމު އެއް މަޝްރޫޢުކަން ފާހަގަކޮށްލަން ޖެހެއެވެ. ކުރީގެ ކޮންޓްރެކްޓަރ އަތުން މި ޕްރޮޖެކްޓް ވަކިކުރި އިރު އެތައް މިލިއަން ފައިސާއެއް ދައުލަތުން ކޮންޓްރެކްޓަރ ނަގާފައިވާކަން ފާހަގަކޮށްލަން ޖެހެއެވެ. އަދި ކުރީގެ ކޮންޓްރެކްޓަރަށް އެމްޑީޕީ ސަރުކާރުން އެ ޕްރޮޖެކްޓް އޭރު ޙަވާލުކުރީ ވެސް އެއަށް ވުރެ ކުޑަކޮށް ކޮށްދިނުމަށް އެހެން ފަރާތަކުން ހުށަހަޅާފައި ވަނިކޮށްކަން މި ނޫހަށް މަޢުލޫމާތު ލިބިފައި ވެއެވެ.
ކެލާ ޞިއްޙީ މަރުކަޒަކީ 2500 އެންހާ މީހުންގެ އާބާދީއެއް އޮންނަ ކެލާ ރައްޔިތުންގެ ޞިއްޙަތާ ގުޅިފައިވާ މުހިންމު ބިނާއެކެވެ. އެ މަރުކަޒުން އެންމެ އެދެވޭ ގޮތުގައި ރައްޔިތުންނަށް ޚިދުމަތްތައް ނުލިބިދިޔުމަކީ ރައްޔިތުންގެ ކަންބޮޑުވުމުގެ ޝުޢޫރުތައް އަބަދުވެސް ފާޅުކުރަމުންދާ ކަމެކެވެ.
ފެޑޯއާ ޙަވާލުކުރެވުނު މި މަސައްކަތް ބާރުދުވެލީގައި ގެންގޮސް ނިންމާ އަވަސް ތާރީޚެއްގައި އެ ޢިމާރާތުގެ ޚިދުމަތް ކެލާ ރައްޔިތުންނަށް ލިބުމަކީ އެ ރައްޔިތުންނަށް ލިބޭނެ ވަރަށް ބޮޑު ހިތްހަމަ ޖެހުމެކެވެ. އަދި އަލަށް އެޅޭ ބިނާއާއެކު އެ މަރުކަޒު ރަނގަޅު ފެންވަރުގެ ޚިދުމަތްތައް ލިބޭ ހޮސްޕިޓަލަކަށް ބަދަލުވެގެން ދިޔުމަކީ ކެލާ ރައްޔިތުން ދެކޭ ހުވަފެނެކެވެ.
