އިސްރާއާއި މިޢުރާޖަކީ ކިރިތި ރަސޫލާއަށް މާތްﷲ ދެއްވި މުޢުޖިޒާތެއްކަމާ އެ ކަމުން މުސްލިމުން ޢިބްރަތް ޙާސިލްކުރުމަށް މި އަހަރުގެ 3ވަނަ ހުކުރު ޚުޠުބާގައި ގޮވާލައްވައިފިއެވެ. މިކަމަށް ގޮވާލައްވާފައި ވަނީ ”އިސްރާއާއި މިޢުރާޖުގެ ޢިބުރަތްތައް” މި މައުޟޫގެ ދަށުން، 2026 ވަނަ އަހަރުގެ ޖަނަވަރީ މަހުގެ 16ވަނަ ދުވަހު އިއްވި ހުކުރު ޚުޠުބާގައެވެ.
އެހެން ޚުޠުބާތަކެކޭ އެއް ގޮތަށް ޚުޠުބާ ފައްޓަވާފައިވަނީ ނަބީބޭކަލުންނާއި، ރަސޫލުބޭކަލުން ޚިޔާރުކުރެއްވި ގަދަކީރިތިވަންތަ މާތްﷲއަށް ޙަމްދު ޘަނާ ދެންނެވުމާއެކު އެކަލާނގެ ރަސޫލުކަމާއިގެން ފޮނުއްވައި މާތްﷲގެ ރިސާލަތު ފުރިހަމަކުރެއްވި ރަސޫލާއަށް ޞަލަވާތާއި ސަލާމް ލެއްވުން އެދި ދުޢާކުރަމުންނެވެ. އަދި މިޞަލަވާތާއި ސަލާމުގައި އެކަލޭގެފާނުގެ އާލު އަޞްޙާބުންނާއި ހެޔޮގޮތުގައި ތަބަޢަވީ އެންމެން ޝާމިލް ކޮށްފައި ވެއެވެ. ހަމައެހެންމެ މާތްﷲ އަށް ތަޤުވާގެރިވުމަށާއި މާތްﷲ ފިޔަވާ ޙައްޤުވެގެން އަޅުކަންކުރެވޭ އެހެންފަތާރެއް ނުވާކަމަށާއި، އެކަލާނގެއަށް ޝަރީކުނުކުރުމަށް ހުރިހާ މުސްލިމުންނަށް ހަނދާންކޮށްދެއްވާފައި ވެއެވެ.
މާތްﷲ އަހަރެމެންގެ ރަސޫލާއަށް ގިނަގުނަ ނިޢުމަތްތަކަކާއި، މުޢުޖިޒާތްތަކެއް ދެއްވިކަމާއި، އޭގެތެރެއިން އިސްރާއާއި މިޢުރާޖުގެ ދަތުރުފުޅަކީ ބޮޑުވެގެންވާ މުޢުޖިޒާތެއްކަން ބަޔާންކުރައްވާފައި ވެއެވެ. އަދި އެއީ އެ ދަތުރުފުޅުގައި ގިނަގުނަ ޢިބްރަތްތަކާއި، އިމްތިޙާނުކުރެއްވުންތައް ހިމެނޭ މަތިވެރި ޙާދިސާއެއްކަމާ މި ދުވަސްވަރަކީ އެ ޙާދިސާގެ ހަނދާތައް އަހަރެމެންގެ ހިތްމައްޗަށް ގެނެސް އެ ކަމުން ފިލާވަޅުތައް ލިބިގަނެ، އީމާންކަމާއި، އަޚްވަންތަކަން ވަރުގަދަކޮށް ހަރުދަނާކުރުމަށް ޢަޒުމް ކަނޑައަޅަންވީ ވަގުތު ކަމަށް ޚުޠުބާގައި ބަޔާންކުރައްވާފައި ވެއެވެ. އަދި މި ޙާދިސާ ހިނގިކަމަށް މަޝްހޫރުވެފައި ވަނީ ރަޖަބުމަހުގެ 27 ވިލޭރޭގަމަށް ވެސް ޚުޠުބާގައި ވެއެވެ.
އިސްރާއާއި މިޢުރާޖުގެ ޙާދިސާގެ ވާހަކަ އަންގަވާ މާތްﷲ ކީރިތި ޤުރްއާނުގައި ވަޙީކުރައްވާފައިވާ އާޔަތުގެ މާނަގައި ވަނީ ”އެކަލާނގެ ހުސްޠާހިރުވަންތަކަމާއެވެ! އެކަލާނގެއީ، މަސްޖިދުލްޙަރާމުން މަސްޖިދުލް އަޤްޞާއަށް އެކަލާނގެ އަޅާ، ރޭގަނޑުން ބައެއްގައި ގެންދެވި ރަސްކަލާނގެއެވެ. އެއީ އެތާނގެ ވަށައިގެން ތިމަންރަސްކަލާނގެ ބަރަކާތްލެއްވި ތަނެވެ. (އެއީ) ތިމަންރަސްކަލާނގެ ކުޅަދުންވަންތަކަމުގެ ހެކިތަކުގެ ތެރެއިން ބައެއް، އެކަލޭގެފާނަށް ދެއްކެވުމަށް ޓަކައެވެ. ހަމަކަށަވަރުން، އެކަލާނގެއީ، މޮޅަށް އައްސަވައިވޮޑިގެންވާ، މޮޅަށް ބައްލަވައިވޮޑިގެންވާ ރަސްކަލާނގެއެވެ.” (ސޫރަތުލް އިސްރާ 1)
އިސްރާއާއި މިޢުރާޖުގެ ދަތުރުފުޅުގައި ކަންތައްތައް ހިނގާދިޔަގޮތުގެ މައްޗަށް ޤުރްއާނާއި ސުންނަތުގެ އަލީގައި ތަފްޞީލުކޮށް ހުކުރު ޚުޠުބާގައި އަލިއަޅުއްވާލާފައި ވެއެވެ. އަދި މިއީ ކީރިތި ރަސޫލާ އިސްލާމީ ދަޢުވަތު ފެތުރުއްވުމުގައި އުފުއްލަވަމުން ގެންދެވި ބުރަތަކާއި، ތަޙައްމަލުކުރެއްވި ދަތިތަކާއި، ކެތްތެރިވެވަޑައިގަތް ކެއްތެރިކަމަށް ޓަކައި މާތްﷲ ދެއްވެވި މަތިވެރި އިނާމެއްކަމުގައި ފާހަގަކުރައްވާފައި ވެއެވެ. މި ޙާދިސާއިން އެނގެނީ ކޮންމެ އުނދަގޫކަމަކާއެކު ފަސޭހަކަމެއް ވާނޭކަމެވެ. މީގެ އިތުރަށް ކޮންމެކަމަކާ ވެސް ކުރިމަތި ލާންޖެހޭނީ ސަލާމަތް ހިތަކާއި ފުރިހަމަ އީމާންކަމާއެކުގައިކަން ޚުޠުބާގައި ހާމަކޮށްދީފައި ވެއެވެ.
މިޢުރާޖުގެ ދަތުރުފުޅުގައި މާތްﷲ މި އުއްމަތަށް ދެއްވި އެންމެ ބޮޑު ނިޢުމަތަކީ ފަރުޟު ފަސްނަމާދުކަމާއި، އެއީ އެއްވެސް މެދުވެރިއަކާ ނުލައި، ރަސޫލާގެ މައްޗަށާއި، އެކަލޭގެފާނުގެ އުއްމަތުގެ މައްޗަށް ފަރުޟުކުރެއްވި މަތިވެރި އަޅުކަމެއްކަން ޚުޠުބާގައި ހާމަކުރައްވާފައި ވެއެވެ.
ޚުޠުބާ ނިންމަވާލައްވާފައިވަނީ މި ޤައުމަށާއި، ޤައުމުގެ ކަންކަމަށް ރަނގަޅުގޮތްވުމަށާއި، ބަލިތަކުން ސަލާމާތްކޮށްދެއްވާ، ބަލިމީހުންނަށް ޝިފާދެއްވުމަށް އެދި ދުޢާކުރަމުންނެވެ. ޤައުމުގެ ކަންކަން އިސްލާމްދީނާ އެއް ގޮތަށް ކުރިޔަށް ގެންދިއުމަށް މަސައްކަތްކުރައްވާ ވެރީންނަށް ހެޔޮގޮތްވުމަށް އެދެމުންނެވެ.
