ހއ. ގެ ގުރޫޕް އޭއިން ސެމީގެ ޖާގަ ކަށަވަރުކުރި ފުރަތަމަ ޓީމަކަށް ފިއްލަދޫ، ބާރަށަށް ވެސް މޮޅެއް
މިހާރު ހިނގަމުންދާ ގޯލްޑަން ފުޓްސަލް މުބާރާތުގައި ހއ. ގެ ގުރޫޕް އޭއިން ސެމީގެ ޖާގަ ކަށަވަރުކުރި ފުރަތަމަ ޓީމަކަށް ފިއްލަދޫ ވެއްޖެއެވެ.
ފިއްލަދޫއިން ސެމީގެ ޖާގަ ޔަޤީންކުރީ ކުޅުނު ތިން މެޗު ކާމިޔާބުކޮށް 9 ޕޮއިންޓާއެކުގައެވެ. ރޭ ހުޅުމާލޭ ރެހެންދި ފުޓްސަލް ދަނޑުގައި 10.00ގައި ކުޅުނު މެޗު ފިއްލަދޫއިން ކާމިޔާބުކުރީ ރަނގަޅު ކުޅުމެއް މި މުބާރާތުގައި ދައްކަމުން އަންނަ ކެލައާ ވާދަކޮށް 2-1 އިންނެވެ. ފިއްލަދޫއިން ޖެހި 2 ލަނޑު ވެސް ޖެހީ އާދަމް ޝާހިދެވެ. ކެލާ ޓީމުން ލަނޑުޖެހީ އިބްރާހީމް ރިޝާލެވެ.
މި މެޗުން ބަލިވި ކެލައަށް އަމިއްލަ ބާރުގައި ސެމީގެ ޖާގަ ލިބެން ނެތް ނަމަވެސް މި މަހުގެ 13ގައި ކުޅޭ ބާރަށު މެޗު ކާމިޔާބު ކުރެވިއްޖެ ނަމަ ގުރޫޕުގެ 2 ވަނަ ޖާގަ ކެލައަށް ލިބުމުގެ ފުރުޞަތު އަދިވެސް އެބަ އޮތެވެ. ކެލައާއި، ފިއްލަދޫ ކުޅުނު މެޗުގެ މޮޅު ކުޅުންތެރިއަކަށް ހޮވުނީ ފިއްލަދޫ ޓީމުގެ ޖަރޒީ ނަންބަރު 14 މުޙައްމަދު ޔާމިނެވެ.
ރޭ 11.00ގައި މި ގުރޫޕުން ކުޅުނު 2 ވަނަ މެޗު ބާރަށް ވަނީ ހޯރަފުށި 6-1 އިން ބަލިކޮށްފައެވެ. މި ނަތީޖާއާއެކު ބާރަށަށް ވެސް ސެމީގެ ޖާގަ ހޯދުމުގެ ފުރުޞަތު ތަނަވަސްކޮށް އެބަ އޮތެވެ. ސަބަބަކީ ރޭގެ ނަތީޖާއާއެކު ކުރިއަށް އޮތް ދެ މެޗު ބާރަށުން ކާމިޔާބުކޮށް 9 ޕޮއިންޓް ހޯދުމުގެ ފުރުޞަތު ތަނަވަސްކޮށް ބާރަަށަށް އޮތީމައެވެ.
ރޭގެ މެޗުގައި ބާރަށުން ލަނޑުޖެހީ މާއިސް 2ލަނޑު، މިޞްބާހް 1 ލަނޑު، ފައިޒަން 1ލަނޑު، ސަޒީމް 1ލަނޑު އަދި ޒައިދާން 1ލަނޑެވެ. މި މެޗުގައި ހޯރަފުށިން ޖެހި ހަމައެކަނި ލަނޑުޖަހައިދިނީ އާދަމް މާހިލެވެ. ބާރަށާއި، ހޯރަފުށި ވާދަކުރި މެޗުގެ މޮޅު ކުޅުންތެރިއަކަށް ހޮވުނީ ބާރަށު ޓީމުގެ ޖަރޒީ ނަންބަރު 17 މުޙައްމަދު މާއިސެވެ.
މި ގުރޫޕުގެ ކުޅުން ދެން އޮންނާނީ މި މަހުގެ 13 ވަނަ ދުވަހުގެ ރޭ 10.00ގައެވެ. އެއް ގަޑިއެއްގައި ދެ ދަނޑުގައި ކުޅުމަށް ހަމަޖެހިފައިވާ އެއް މެޗުގައި ބައްދަލުކުރާނީ ބާރަށާއި، ކެލައެވެ. އަނެއް މެޗުގައި ބައްދަލުކުރާނީ ހޯރަފުށްޓާއި، ތުރާކުނެވެ.
