ޤިޔާމަތްދުވަހުގެ ބިރުވެރިކަމުން ސަލާމަތްވުމަށް ގަދައަޅައި މަސައްކަތްކުރުމަށް މިއަދުގެ ޚުޠުބާގައި ގޮވައިލައްފި
ޤިޔާމަތްދުވަހުގެ ބިރުވެރިކަމުން ސަލާމަތްވުމަށް ގަދައަޅައި މަސައްކަތްކުރުމަށް، މިއަދުގެ ހުކުރު ޚުޠުބާގައި އަހަރެމެންނަށް ގޮވައިލައްވައިފިއެވެ.
ދުނިޔެވީ ޙަޔާތަކީ ވަގުތީ ޙަޔާތެއްކަމާ، ކޮންމެ އިންސާނަކު ވެސް މަރުގެ ރަހަ ދެކޭނެކަމާ އެ ކަމަށް ތައްޔާރުވެ ހުރުމަށް ޚުޠުބާގައި ގޮވާލައްވާފައި ވެއެވެ. އަދި މާތްﷲ އިންސާނުން ހެއްދެވީ ބޭކާރު ގޮތުގައި ނޫންކަމާ، މާތްﷲގެ ޙަޟުރަތުގައި ކޮއްޅަށް ހުންނަންޖެހޭ ދުވަހު، އެއްވެސް މީހަކަށް އަނެކަކަށް ކޮށްދެވޭނޭ ކަމެއް ނޯންނާނެކަން އިލާހީ ވަޙީގެ ދަލީލާއެކު ޚުޠުބާގައި ބަޔާންކޮށްދެއްވާފައި ވެއެވެ. އަދިހަމައެހެންމެ އެ ދުވަހުގެ އިމްތިޙާނާ ކޮންމެ މީހަކު ވެސް ކުރިމަތިލާން ޖެހޭނެކަމާ އެ ކަމަށް ތައްޔާރުވެއްޖެތޯ؟ މިއަދުގެ ޚުޠުބާގައި އަހަރެމެންނާ ސުވާލުކުރެއްވިއެވެ.
ޚުޠުބާގައި ފާހަގަކުރެއްވި ގޮތުގައި، ޤިޔާމަތް ދުވަހަކީ އިންސާނާގެ ކުރިމަތީގައި އޮތް އެންމެ ބޮޑު އިމްތިޙާނެވެ. އެ ދުވަހަކީ އެކަކު އަނެކަކަށް އެހީތެރިވެދެވޭނޭ ދުވަހެއް ނޫނެވެ. އެއީ ކޮންމެ މީހަކުވެސް އަމިއްލަ ނަފުސުގެ ސަލާމަތާ މެދު ކަންބޮޑުވެ، އަވަދިނެތި އުޅެންޖެހޭނޭ ބިރުވެރި ދުވަހެކެވެ.
ޤިޔާމަތް ދުވަހުގެ ބިރުވެރިކަމުގެ ވާހަކަތައް ބަޔާންކުރެވިފައިވަނީ އިންސާނުން އެއިން ޢިބުރަތް ލިބިގަނެ، އެ ދުވަހަށް ތައްޔާރުވުމަށާއި، އެއީ މީސްތަކުންގެ މެދުގައި ޢަދުލުވެރިކަމާއެކު ހިސާބުބެއްލެވި، ޙައްޤުވެރިންނަށް ޙައްޤު ހޯދައިދެވޭނޭ ދުވަހެއް ކަމަށާއި، ތަޤުވާވެރިން އެ ދުވަހު ރަޙުމާންވަންތަ ރަސްކަލާނގެ ޙަޟުރަތަށް ޢިއްޒަތްތެރި ވަފުދެއްގެ ގޮތުގައި އެއްކުރެވޭނެކަމަށް ޚުޠުބާގައި ވިދާޅުވިއެވެ.
މިއަދުގެ ޚުޠުބާގައި، މަރު އައިސް އަހަރެމެންނާ ބައްދަލުކުރާނެކަމާ، މަޙްޝަރު ދުވަހާ ޖެހެންދެން ކޮންމެ މީހަކު ވެސް އޮންނާނީ ކަންވަޅުގައި ކަން ހާމަކޮށްދެއްވާފައި ވެއެވެ. އަދި މަޙްޝަރުގެ މައިދާނުގެ ބިރުވެރިކަމާ، އެ ދުވަހު އެ ތަނުގައި ހުއްޓި ހުންނަ ހުރުމަކީ އުނދަގޫ ނުވަތަ ފަސޭހަ ކަމެއްގެ ގޮތުގައި ހެދުމުގެ އިޚްތިޔާރު އޮތީ އަހަރެމެންގެ އަތްމަތީގައި ކަމަށް ވެސް ޚުޠުބާގައި ބަޔާންކުރައްވާފައި ވެއެވެ.
އެ ގޮތުން ދުނިޔެމަތީގައި ރަނގަޅަށް އުޅުނު ފަރާތްތަކަށް އެ ދުވަހު އެ ބިރުވެރިކަމުން ސަލާމަތްކަން ލިބޭ އިރު ދުނިޔެމަތީގައި މާތްﷲއަށް އުރެދި ފާފަކުރަމުން ދިޔަ ފަރާތްތައް އެ ދުވަހުން އުޅޭނެ ހިތްދަތިކަން ޤުރްއާނާއި، ރަސޫލާގެ ސުންނަތުގެ އަލީގައި މިއަދުގެ ހުކުރު ޚުޠުބާގައި ބަޔާންކުރައްވާފައި ވެއެވެ.
