ކުލިނިކްތަކާއި، އައިނު ފިހަރަތަކުން ހަދާ އައިނުތަކަށް ވެސް އާސަންދަތެރޭން ޚަރަދުކުރެވޭ ގޮތަށް ހަމަޖެހިފައިވާ ކަމަށް ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން މިއަދު ހާމަކޮށްފިއެވެ. މި ގޮތަށް މި ކަން ހަމަޖެހިގެން ދިޔައީ ރައީސް ޑރ. މުހައްމަދު މުއިއްޒު، ރައްޔިތުންނާއެކު ބޭއްވި ބައްދަލުވުންތަކުގައި ބައެއް ފަރާތްތަކުން އެ ކަންބޮޑުވުން ފާޅުކޮށްފައިވާ ދަނޑިވަޅެއްގައެވެ.
އެންސްޕާއިން މިއަދު ނެރުނު ބަޔާނުގައި ހާމަކޮށްފައި ވަނީ ރައްޔިތުން ފާޅުކުރި ކަންބޮޑުވުންތަކާއި، ދެއްވި ޚިޔާލުތަކާ ގުޅިގެން އާސަންދަ ސްކީމުން ފޯރުކޮށްދެމުންދާ ޚިދުމަތްތައް ފުޅާކޮށް، ރައްޔިތުންނަށް ލުއިފަސޭހަވާނެ ފަދަ ގޮތްތަކެއް ހަމަޖެއްސުމަށް މަސައްކަތް ކުރަމުންދާ ކަމަށެވެ.
އެ ގޮތުން ކުލިނިކްތަކާއި، އައިނު ފިހާރަތަކުގައި ރަޖިސްޓްރީކޮށްފައިވާ އޮޕްޓޮމެޓްރިސްޓުން ޕްރިސްކްރައިބްކުރާ އައިނުތައް އާސަންދައިގެ ދަށުން ހެދުމަށް ނިންމާފައިވާކަމަށެވެ. އަދި އަންނަ މަހުގެ 15 ވަނަ ދުވަހުން ފެށިގެން އެ ފަދަ ތަންތަނުން އާސަންދައިގެ ޚިދުމަތްދިނުމުގެ މަސައްކަތް ފެށޭނެ ކަމަށް އުންމީދުކުރައްވާ ކަމަށް ހާމަކުރައްވާފައި ވެއެވެ.
އަމިއްލަ ކުލިނިކުތަތަކާއި، އައިނު ފިހާރަތަކުން ހަދާ އައިނުތަކަށް އާސަންދަތެރޭން ޚަރަދު ލިބޭގޮތް ހަމަޖެހިގެން ދިޔުމަކީ ރައްޔިތުންނަށް ލިބުނު ވަރަށް ބޮޑު ފަސޭހައެކެވެ.
