ދިވެހި ފިލްމީ އިންޑަސްޓްރީގައި މަޝްހޫރުކަން ހޯދާފައިވާ ކުރީގެ ޑައިރެކްޓަރ ޢަބްދުލްފައްތާޙް މިރޭ 8.05 އެހައިކަންހާ އިރު ހއ. ދިއްދޫގައި ހުންނަ ހއ. އަތޮޅު ހޮސްޕިޓަލުގައި ނިޔާވެއްޖެއެވެ. ތިލައުތުރު ނޫހަށް ލިބިފައިވާ މަޢުލުމާތު ކުށްކަމުގައި ނުވާނަމަ ފައްތާޙް ނިޔާވީ ހާޓްއެޓޭކެއް ޖެހިގެން ދިއްދުއަށް ގެނެސް ފަރުވާދެމުން ދަނިކޮށެވެ.
ފައްތާޙް، ނިޔާވި އިރު ފައްތާޙަށް ވަނީ ކުރިއަށް އޮތް ލޯކަލް ކައުންސިލް އިންތިޚާބުގައި ކެލާ ކައުންސިލްގެ ރައީސްކަމަށް ދިވެހިރާއްޖޭގެ ވެރިކަންކުރާ ޕާޓީ (ޕީއެންސީ)ގެ ޓިކެޓްގައި ވާދަކުރުމަށް ޕްރައިމަރީއަކާ ނުލައި ޓިކެޓް ވެސް ލިބިފައެވެ.
2004 ވަނަ އަހަރު ފިލްމީ ދާއިރާއިން ޤައުމީ އިނާމު ޙާޞިލްކުރައްވާފައިވާ ފައްތާޙް، 2018 ވަނަ އަހަރުން ފެށިގެން ދިރިއުޅެމުން އައީ އަމިއްލަ ރަށް ކަމުގައިވާ ހއ. ކެލާގައެވެ.
އަމިއްލަ މަސައްކަތުން ދިރިއުޅެމުން އައި، ފައްތާޙު މިރޭ ނިޔާވި އިރު ދެ ދަރިންނާއި، އަންބަކު ދުނިޔޭގައި އެބަތިއްބެވެ. ފައްތާޙުގެ ކުއްލި ވަކިވުމުން މުޅި ކެލަށް މިރޭ ވަނީ ފަޅުކަމެއް ލިބިފައެވެ.
