އާރުޑީސީއާ ޙަވާލުކޮށްފައިވާ ކެލާ ޕޮލިސް ސްޓޭޝަންގެ ޢަމަލީ މަސައްކަތް އިއްޔެ ފައްޓައިފިއެވެ.
އާބާދީގައި 2500 އެއްހައި މީހުން ދިރިއުޅޭ ކެލާގައި ޢިމާރާތްކުރުމަށް ހަމަޖެހިފައިވާ ޕޮލިސް ސްޓޭޝަންގެ މަސައްކަތް އިއްޔެ ފެށިފައި ވާއިރު މި ޕޮލިސް ސްޓޭޝަނަކީ މީސްމީހުންގެ އަމިއްލަ ގޭގޭގައި ދެމުން އަންނަ ޕޮލިސް ޚިދުމަތަށް ނިމުން އަންނާނެ ކަމެކެވެ.
ރައީސް ޔާމީނުގެ ވެރިކަމުގައި ކެލާގައި ފެށުނު ޕޮލިސް ޚިދުމަތް ދެ ސަރުކާރެއްގެ މުއްދަތު ފަހަނައަޅައި ދިިޔަ އިރުވެސް ޕޮލިހުންގެ އަމިއްލަ ހިޔާވައްސަކަށް އޮތީ ބަދަލު ނުކުރެވިއެވެ.
ރައީސް ޑރ. މުޙައްމަދު މުޢިއްޒު ކެލައަށް ވެ ވަޑައިގެންނެވި ވަޢުދުފުޅުގެ ތެރޭގައި ހިމެނޭ ގިނަ ކަންތައްތަކެއް ކައިރި ތާރީޚުތަކެއްގައި ފެށިގެން ދާނެ ކަމަށް އެ މަސައްކަތްތައް ޙަވާލުކުރައްވާފައިވާ ކުންފުނިތަކާ ޙަވާލާދެއްވާ ރައްޔިތުންގެ މަޖިލީހުގެ ކެލާ ދާއިރާގެ ޢިއްޒަތްތެރި މެންބަރު ޢަބްދުﷲ ޝަރީފު ވަނީ ކެލާ ރައްޔިތުންނާ ބައްދަލުކުރައްވާ ވިދާޅުވެފައެވެ.
މެންބަރު ޝަރީފު ވިދާޅުވެފައި ގޮތުގައި ކެލާގެ މަތިފަރާތުގެ ގޮނޑުދޮށް ޙިމާޔަތްކުރުމާ ގުޅޭ މަސައްކަތާއި، މަގު ހެދުމުގެ ޢަމަލީ މަސައްކަތް ވެސް މި މަހު ތެރޭ ފެށޭނެއެވެ.
ތިލައުތުރު ނޫހަށް މަޢުލޫމާތު ލިބިފައި ގޮތުގައި ނިމި ދިޔަ ހަފުތާތެރޭ ޞިއްޙީ މަރުކަޒުގެ ބިޑްތައް ވެސް ވަނީ ކަނޑާފައެވެ. ލަސްނުވެ އެ މަސައްކަތް ވެސް އެވޯޑުކުރެވި ފެށިގެންދާނެ ކަމަށް ބެލެވެއެވެ.
