މިހާރު މުޅި ރާއްޖެއަށް ކުރަމުން އަންނަ ހުޅަނގު މޫސުމުގެ ވިއްސާރައިގައި އިއްޔެ ހަވީރުން ސުރެ ވެހެމުން އަންނަ ވާރޭގެ ސަބަބުން ތިލަދުންމަތީ އުތުރުބުރީ ކެލާގައި ފެން ބޮޑުވެއްޖެއެވެ.
މޫސުމާ ބެހޭ ޤައުމީ އިދާރާއިން މިއަދު އާންމުކުރެއްވި ނަތީޖާ ދައްކާ ގޮތުން މުޅި ރާއްޖެއިން އިއްޔެ އެންމެ ގިނައިން ވާރޭވެހިފައިވާ ކަމަށް ރެކޯޑުކުރެވިފައި ވަނީ ވެސް ކެލައަށެވެ. އެ ފަރާތުން ހާމަކުރައްވައިފައިވާ ގޮތުގައި ކެލައަށް އިއްޔެ ވަނީ 231 މިލިމީޓަރގެ ވާރޭވެހިފައެވެ.
ކެލާގައި ފެން ބޮޑުވުމުގެ ސަބަބުން ފެން ހިންދުމުގެ މަސައްކަތް ރެއިން ފެށިގެން މެދު ނުކެނޑި އަންނަނީ ކުރަމުންނެވެ. މިހާރު އަންނަނީ ކޯރު ކަނޑައިގެން ފެންގަނޑު މޫދަށް ބޭރުކުރުމުގެ މަސައްކަތް ކުރަމުންނެވެ.
ފެންބޮޑުވުމުގެ ސަބަބުން ރަށުގެ ބައެއް ގެތަކަށް މިހާރު ވަނީ ފެންވަދެ، ގެތަކުން ވެސް ފެން ހިއްކުމުގެ މަސައްކަތްކުރަން ޖެހިފައެވެ. ފެން ހިންދުމަށް ކުރަމުންއަންނަ މަސައްކަތުގައި ރަށުގެ ގިނަ ބަޔަކު އަންނަނީ ބައިވެރިވަމުންނެވެ.
ތިލައުތުރަށް ޚަބަރު ލިބިފައިވާ ގޮތުގައި އެމްއެންޑީއެފް ނޮދަން އޭރިޔާގެ ޓީމެއް ވެސް، ފެން ހިންދުމުގެ މަސައްކަތުގައި ބައިވެރިވުމަށް ފެން ބޮޑުވެފައިވާ ރަށްތަކަށް މިހާރު އަންނަނީ ދަތުރުކުރަމުންނެވެ.
