ކެލާ ކައުންސިލް ސްޕޯރޓްސް ފިއެސްޓަރ ވޮލީ މުބާރާތުގެ ތަށި ކެލާގައި ބެހެއްޓުމުގެ ޢަޒުމުގައި ކެލާ ޓީމު ނުކުންނަނީ
އަންނަ ނޮވެންބަރު މަހުގެ 14 ވަނަ ދުވަހު ފެށުމަށް ހަމަޖެހިފައިވާ ކެލާ ކައުންސިލް ސްޕޯރޓްސް ފިއެސްޓަރ ވޮލީ މުބާރާތުގެ ތަށި ކެލާގައި ބެހެއްޓުމުގެ ޢަޒުމުގައި ކެލާ ޓީމު ނުކުންނަ ކަމަށް ނިޔާ އެކަޑަމީން އިންތިޒާމުކޮށްގެން ހއ. މުރައިދޫގައި މި އަހަރު ބޭއްވި ވެޓްރަންސް ވޮލީ މުބާރާތުގެ އެންމެ މޮޅު ކުޅުންތެރިޔާގެ މަޤާމު ޙާޞިލްކުރި ޢަލީ ޒިޔާމް ހާމަކޮށްފިއެވެ.
ތިލަ އުތުރު ނޫހަށް ޢަލީ ޒިޔާމު ދެއްވި ބަސްދީގަތުމުގައި ބުނުއްވީ ކެލާ ކައުންސިލުން ބާއްވާ ވޮލީ މުބާރާތުގެ ކެލާ ޓީމު ވާދަކުރަނީ ކެލާ ޕޮލިހުގެ ނަމުގައި ކަމަށެވެ. މި ޓީމުގައި މުރައިދޫ ވެޓްރަންސް މުބާރާތުގައި ވާދަކުރި ކުޅުންތެރިންގެ ތެރެއަށް ވަރުގަދަ ދެ ކުޅުންތެރިއަކު އިތުރުވެ ޓީމު ކުރިއަށް ވުރެ ރަނގަޅުވާނެ ކަމަށް ޢަލީ ޒިޔާމު ބުނުއްވިއެވެ.
ކެލާގައި ބާއްވާ މި މުބާރާތުގައި ހދ. އަތޮޅުން ހަނިމާދޫއާއި، ނޮޅިވަރަންފަރު ބައިވެރިވެއެވެ. ހއ. އަތޮޅުން ކެލާގެ އިތުރުން ހޯރަފުށްޓާއި، ދިއްދޫއާއި އަދި ފިއްލަދޫ ވާދަކުރެއެވެ.
ފިއެސްޓަރ ވޮލީ މުބާރާތް ފެށުމަށް ހަމަޖެހިފައި ވަނީ ތިލައުތުރު ފުޓްސަލް މުބާރާތުގެ ފޯރި މުޅިން ކެނޑިގެން ނުދަނީސް ކަމަށް ވުމީ މި މުބާރާތުގެ ފޯރި އިތުރަށް ގަދަވެގެންދާނެ ކަމެކެވެ.
