ގޯލްޑަން ފްޓްސަލްގައި ވާދަކުރާ ޓީމުގެ ކަންތައްތައް އިންތިޒާމުކޮށްދޭނެ ފަރާތެއް ހޯދުމަށް ހުޅުވައިލައިފި
ގޯލްޑަން ފްޓްސަލް މުބާރާތް 2026 ގައި ބައިވެރިވާ ހއ. ކެލާ ޓީމުގެ އެންމެހައި ކަންތައްތައް އިންތިޒާމުކޮށް ޓީމުގެ ކަންތައްތައް މެނޭޖުކޮށްދޭނެ ފަރާތެއް ހޯދުމަށް ކުރި ފުރަތަމަ އިޢުލާނާ ގުޅިގެން ހުށަހެޅި އަގުތައް ބޮޑުވުމާ ގުޅިގެން ދެ ވަނަ ފަހަރަށް ހުޅުވައިލައިފިއެވެ.
ގެޒެޓް މެދުވެރިކޮށް ކުރެއްވި އިޢުލާނުގައި ހާމަކުރައްވާފައިވާ ގޮތުގައި މި ކަމަށް އެދި ޕްރޮޕޯސަލް ހުށަހެޅޭނީ ކެލާގައި ރަޖިސްޓްރީކޮށް ހިންގާ ކުލަބު ޖަމްޢިއްޔާތަކާއި، ކުޅިވަރު އެކަޑަމީތަކަށެވެ.
ޕްރޮޕޯސަލް ހުށަހެޅުމަށް ރަޖިސްޓްރީކުރުމަށް ހުޅުވައިލައިފައި ވަނީ މި ހިނގާ އޮކްޓޯބަރު މަހުގެ 27 ވަނަ ދުވަހުގެ 12.00 ގެ ކުރިންނެވެ. ރަޖިސްޓްރީވުމަށް އެދޭ ފޯމު ފުރިހަމަކުރުމަށް ފަހު، ހާޑު ކޮޕީ އެ ކައުންސިލަށް ހަވާލުކުރުމުގެ އިތުރުން މެއިލް ވެސް ކުރެވިދާނެއެވެ.
ޕްރޮޕޯސަލާ ބެހޭ މަޢުލޫމާތު ދިނުމުގެ ބައްދަލުވުން ބޭއްވުމަށް ހަމަޖެހިފައި ވަނީ މި މަހުގެ 27ވާ ހޯމަ ދުވަހުގެ (މާދަމާގެ) 13.00 ގައެވެ. ޕްރޮޕޯސަލް ހުށާހެޅުމުގެ ބައްދަލުވުން ބޭއްވުމަށް ހަމަޖެހިފައި ވަނީ އަންނަ ނޮވެންބަރު މަހުގެ 4 ވާ އަންގާރަ ދުވަހުގެ 13.00 ގައެވެ.
ރަނގަޅު ކާމިޔާބަކާ ހަމައަށް ދިޔުމުގެ ނަސީބު ގޯލްޑަން ފުޓްސަލްގައި ކެލައަށް މިހާތަނަށް ލިބިފައި ނުވިއަސް، އާންމުކޮށް މި މުބާރާތުގައި ކެލާ ޓީމެއް ވާދަކުރެއެވެ. ކެލާ ކައުންސިލްގެ ފުރިހަމަ ސަޕޯރޓާއެކު ގޯލްޑަން ފްޓްސަލްގައި ވާދަކުރުމަކީ ފުޓުބޯޅައަށް ލޯބިކުރާ ކެލާގެ ޒުވާނުންނަށް ލިބޭ ވަރަށް ބޮޑު އުފަލެކެވެ.
