ތިލަދުންމަތީ އުތުރުބުރީ ކެލާ ކައުންސިލުން 3 އެއްބަސްވުމެއްގައި 3 ފަރާތަކާއެކު ސޮއިކޮށްފިއެވެ. ހިނގަމުން މިދާ ހަފުތާގެ ތެރޭގައި އެ ކައުންސިލުން ސޮއިކުރި 3 އެއްބަސްވުމަކީ ތިލައުތުރު ފުޓުސަލް މުބާރާތުގައި ވާދަކުރާ ކެލާ ޓީމުގެ ކަންތައްތަކާއި، ވޮލީ ކޯޓު ބޮޑުކުރުމުގެ މަސައްކަތާއި އަދި އެ ކައުންސިލަށް ބޭނުންވާ ލައިޓް ޕޯސްޓް ހޯދުމުގެ އެއްބަސްވުމެވެ.
މި އަހަރު އުތީމުގައި ބޭއްވުމަށް ހަމޖެހިފައިވާ ތިލައުތުރު ފުޓުސަލް މުބާރާތުގައި ވާދަކުރާ ކެލާ ޓީމުގެ އެންމެހައި ކަންކަން އިންތިޒާމުކޮށް މެނޭޖުކުރުމުގެ އެއްބަސްވުމުގައި ސޮއިކުރީ ކެލާ ސްޕޯރޓްސްއާއެކުގައެވެ. ކެލާ ސްޕޯރޓްސްގެ ފަރާތުން މި އެއްބަސްވުމުގައި ސޮއިކުރެއްވީ މުޙައްމަދު މާލިކެވެ.
ވޮލީ ކޯޓުގެ ހުޅަނގު ފަރާތުގެ ފެންސު ކަނޑައިލައި ރޮސްޓްރަމުގެ ބައި ހިމެނޭ ގޮތަށް ބޮޑުކުރުމުގެ މަސައްކަތުގެ އެއްބަސްވުމުގައި ސޮއިކުރީ ކެލާ ނަރުގިސްވިލާ މުޙައްމަދު ސިރުހާނާއެކުގައެވެ. މި އެއްބަސްވުމުގައި ސިރުހާނުގެ ފަރާތުން ސޮއިކުރެއްވީ ޙުސައިން ޙަމީދެވެ.
އެ ކައުންސިލަށް ހޯދަން ބޭނުންވާ ގަލްވަނައިޒްޑް 80 ހެކްސަގަނަލް ލައިޓް ޕޯސްޓާއި، 320 ޖޭ ބޯލްޓާއި، 320 ނަޓާއި އަދި 320 ވަސަރު ސަޕްލައިކޮށްދިނުމުގެ އެއްބަސްވުމުގައި ސޮއިކުރީ ފެލްކަން ސޭފްޓީ ޕްރައިވެޓް ލިމިޓެޑާއެކުގައެވެ. ފެލްކަން ސޭފްޓީ ޕްރައިވެޓް ލިމިޓެޑްގެ ފަރާތުން މި އެއްބަސްވުމުގައި ސޮއިކުރެއްވީ މުޙައްމަދު އަހްލާމެވެ.
ކެލާ ކައުންސިލުން ސޮއިކުރި މި އެއްބަސްވުންތަކުގެ ތެރެއިން ތިލައުތުރު ފުޓުސަލް މުބާރާތުގައި ވާދަކުރާ ކެލާ ޓީމުގެ އެންމެހައި ކަންކަން އިންތިޒާމުކޮށް މެނޭޖުކުރުމުގެ އެއްބަސްވުމުގެ އަގު އެނގެން ނެތް ނަމަވެސް ވޮލީ ކޯޓު ބޮޑުކުރުމުގެ މަސައްކަތުގެ އަގަކީ 33350.00 ރުފިޔާއެވެ. ލައިޓް ޕޯސްޓް ހޯދުމުގެ މަސައްކަތުގެ އަގަކީ 302400.00 ރުފިޔާއެވެ.
