މުޅި މުބާރާތުގެ ބަލައިގެން ކިޔެވުމުގެ ގޮފިން 1 ވަނަ ކެލާ ޔޫތު ފޯރަމްގެ ޔައިޝް މުޙައްމަދު ނިޔާޒް ހޯދައިފި
ކީރިތި ޤުރުއާން ކިޔެވުމުގެ 36 ވަނަ ޤައުމީ މުބާރަތުގެ ބަލައިގެން ކިޔެވުމުގެ ގޮފިން 1 ވަނަ ކެލާ ޔޫތު ފޯރަމްގެ ޔައިޝް މުޙައްމަދު ނިޔާޒް ހޯދައިފައެވެ.
މުބާރާތުގެ ނަތީޖާ ފާޅުކުރުމަށް ރޭ އިސްލާމީ މަރުކަޒުގެ ޖަލްސާކުރާ މާލަމުގައި ބޭއްވި ޖަލްސާގައި ޔައިޝްއަށް އިނާމާއި، ސެޓްފިކެޓާއި، ޓްރޮފީ ޙަވާލުކޮށްދެއްވީ ދިވެހިރާއްޖޭގެ ޢިއްޒަތްތެރި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒެވެ.
މި މުބާރާތުގައި ޔައިޝް ވާދަކުރީ 15 ފޮތުން ބަލައިގެން ކިޔެވުމުގެ ބައިގައެވެ. މި ބައިން ވެސް އޭނާ ވަނީ 1 ވަނަ ހޯދާފައެވެ. ޔައިޝްގެ އިތުރުން މި މުބާރާތުގެ ބަލައިގެން ކިޔެވުމުގެ 20 ފޮތުގެ ބައިގައި ވާދަކުރި ޙައްވާ އަހުދާ ޢާމިރު ވެސް ވަނީ އެ ބައިން 3 ވަނަ ހޯދާފައެވެ.
މި މުބާރާތުގައި އަލަށް ވާދަކުރި ކެލާ ޔޫތު ފޯރަމް ވަނީ އެހެނިހެން މުއައްސަސާތަކުގެ ބައިން ބަލައިގެން ކިޔެވުމުގެ ގޮފިން 2 ވަނަ ހޯދާފައެވެ.
