ގޯލްޑަން ފުޓްސަލް ޗެލެންޖު 2025 ގައި ފިއްލަދޫ، ހޯރަފުށި އެއްވަރުވެ ބާރަށުގެ މައްޗަށް މާރަންދޫ ކުރި ހޯދައިފި
ގޯލްޑަން ފުޓްސަލް ޗެލެންޖު 2025 ގައި ފިއްލަދޫ، ހޯރަފުށި އެއްވަރުވެ ބާރަށުގެ މައްޗަށް މާރަންދޫ ކުރި ހޯދައިފިއެވެ. މިރޭ ރެހެންދި ފުޓްސަލް ދަނޑުގައި، ފިއްލަދޫއާއި، ހޯރަފުށި ކުޅުނު މެޗް ނިމުނީ 2 ލަނޑު 2 ލަނޑުން އެއްވަރު ވެގެންނެވެ. މިއީ ފިއްލަދޫ ޓީމް ކުޅުނު ފުރަތަމަ މެޗް ކަމަށް ވިއަސް، ހޯރަފުށި ކުޅުނު މިއީ ދެ ވަނަ މެޗެވެ. ހޯރަފުށި ކުޅުނު ފުރަތަމަ މެޗްގައި ބާރަށް ކައިރިން އެ ޓީމް ވަނީ ބަލިވެފައެވެ.
މިރޭ މާރަންދޫއާއި، ބާރަށް ބައްދަލުކުރި މެޗް، ބާރަށުގެ މައްޗަށް ކުރި ހޯދައި 2 ލަނޑު 0 ލަނޑުން ކާމިޔާބުކުރީ މާރަންދޫއެވެ. މިއީ މި މުބާރާތުގައި މި ދެ ޓީމް ވެސް ކުޅުނު ދެ ވަނަ މެޗެވެ. މާރަންދޫ، ކެލާ ކައިރިން ކުރީ މެޗްގައި ބަލިވި އިރު، ބާރަށް ވަނީ ހޯރަފުއްޓާއެކު ކުޅުނު މެޗް ކާމިޔާބު ކޮށްފައެވެ.
ގޯލްޑަން ފުޓްސަލް ޗެލެންޖު 2025 ގައި ފިއްލަދޫ، ހޯރަފުށި ކުޅުނު މެޗްގެ މޮޅު ކުޅުންތެރިއަކަށް ހޮވުނީ ފިއްލަދޫ ޓީމުގެ ޖަރޒީ ނަންބަރު 10 މުޙައްމަދު ހުޝާމެވެ. މާރަންދޫއާއި، ބާރަށް ކުޅުނު މެޗްގެ މޮޅު ކުޅުންތެރިއަކަށް ހޮވުނީ މާރަންދޫ ޓީމުގެ ޖަރޒީ ނަންބަރ 16 ހުމައިދު ޙުސައިނެވެ.
ހއ. އަތޮޅުގެ ބީ ގުރޫޕުގެ ނަތީޖާ ތާވަލަށް ބަލައި އިރު ކެލާއަށް 3 ޕޮއިންޓް، ބާރަށަށް 3 ޕޮއިންޓް، މާރަންދުއަށް 3 ޕޮއިންޓް، ފިއްލަދޫއަށް 1 ޕޮއިންޓް އަދި ހޯރަފުއްޓަށް މިހާރު މި ވަނީ 1 ޕޮއިންޓް ލިބިފައެވެ.
މި ގުރޫޕްގެ މެޗްތަކުގެ ކުޅުން ދެން އޮންނާނި މި މަހުގެ 13 ވަނަ ދުވަހުގެ ރެއެވެ. މި މެޗުތަކުގެ ކުޅުން ބަލައިލުމަށް ގިނަ ބަޔަކު ދަނޑަށް ދިޔުމަކީ ޓީމުތަކުގެ ކުޅުންތެރިންނަށް ލިބޭ ވަރަށް މަތިވެރި ހިތްވަރެކެވެ.
