ހއ. ދިއްދޫ ފަތޯ ސްޕޯރޓްސް އެކެޑަމީގެ ސީނިއަރ އަންހެން ޓީމާ، ކެލާ ޔޫތު ފޯރަމް ސްޕޯރޓްސް އެކެޑަމީގެ ސީނިއަރ އަންހެން ޓީމާއެކު ރަޙުމަތްތެރިކަމުގެ ހޭންޑް ބޯލް މެޗެއް ކުޅެފިއެވެ. އިއްޔެ ހަވީރު ކެލާ ފްޓްސަލް ދަނޑުގައި ކުޅުނު މި މެޗް ޝަރަފުވެރިކޮށްދެއްވީ ކެލާ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ރައީސާ އަލްފާޟިލާ ޙައްވާ ފަޒްނާއެވެ.
މި ދެ އެކެޑަމީއަކީ ވެސް ހޭންޑް ބޯލް ކުރިއަރުވާ ތަރައްޤީ ކުރުމަށް ހއ. އަތޮޅުގައި އެކަށޭނަ މަސައްކަތްތަކެއް ކުރަމުން އަންނަ ދެ އެކެޑަމީއެވެ. މި ދިޔަ އަހަރުގެ ފަހު ކޮޅުގައި ހޭންޑް ބޯލް އިންސްޓްރަކްޓަރުން ތަމްރީނު ކުރުމުގެ ކާމިޔާބު މަސައްކަތްތަކެއް ވެސް ކެލާ ޔޫތު ފޯރަމް ސްޕޯރޓްސް އެކަޑަމީން ކޮށްފައިވާ އިރު، ދިއްދޫ އެކެޑަަމީއަކީ މާލޭގައި އޮންނަ ހޭންޑް ބޯލް މުބާރާތްތަކުގައި ވެސް ވާދަކުރާ އެކެޑަމީއެއްކަން ފާހަގަކޮށްލަން ޖެހެއެވެ.
އިއްޔެ ހަވީރު ކެލާގައި ކުޅެވުނު ހޭންޑް ބޯލް މެޗް 23 ގޯލް 7 ގޯލުން ކާމިޔާބުކުރީ ދިއްދޫ ފަތޯ ސްޕޯރޓްސް އެކެޑަމީއެވެ. މި ފަދަ މެޗްތައް ގިނަގިނައިން ކުޅި، ވާދަވެރި ރޫޙެއް މި ކުޅިވަރުގައި އުފެދިގެން ދިޔުމަކީ ހުނަރުވެރި ކުޅުންތެރިން ބިނާވުމަށް މަގުފަހި ވާނެ ކަމެކެވެ.
