މި ހިނގާ ޑިސެންބަރު މަހުގެ 27ވަނަ ދުވަހު ބޭއްވުމަށް ހަމަޖެހިފައިވާ ޕްރައިމަރީގައި ކެލާ ކައުންސިލްގެ ރައީސް ކަމަށް ވެރިކަންކުރާ ޕާޓީ ޕީއެންސީން ހުށަހަޅައިވާ ހއ. ކެލާ ފުސްވިލާގޭ މުޙައްމަދު ޝުޖާޢު އޭނާއާއެކު ޕްރައިމަރީގައި ވާދަކުރަން ހުށަހަޅައިފައިވާ ހއ. ކެލާ ކާނިގަސްދޮށުގޭ ޢަބްދުލްފައްތާޙަށް ޑިމޮކްރަސީގެ ރީތި ހަމަތަކާއި އުޞޫލުގެ ތެރޭން ފުރުޞަތު ދެއްވައިފިއެވެ.
ޕީއެންސީގެ ކެލާގެ ސްޓީރިންގ ކޮމިޓީއާއި، އެޑްވައިޒަރީ ކޮމިޓީ އެކުވެގެން ރޭ އޮންލައިންކޮށް ބޭއްވި ބައްދަލުވުމެއްގައި އެ ފުރުޞަތު ފައްތާޙަށް ދެއްވިކަން ޝުޖާ ވަނީ އިޢުލާންކުރައްވާފައެވެ.
މި ކަން އިޢުލާންކުރައްވަމުން ޝުޖާ ވިދާޅުވީ ޕާޓީގެ މަޞްލަޙަތާއި، ހަމަޖެހުމަށް ބަލައި އޭނާގެ ނަން ނަގަން ނިންމެވި ކަމަށެވެ. އަދި ފައްތާޙަށް ޝުޖާއާއި، ޝުޖާގެ ޓީމުން ފުލް ސަޕޯރޓް ދެއްވާނެ ކަމަށެވެ.
ޝުޖާގެ މި ނިންމެވުމާ ގުޅިގެން ރޭގެ ބައްދަލުވުމުގައި އެތައް ބަޔަކު ޝުޖާގެ އެ ނިންމެވުމަށް ތަޢުރީފުކުރައްވާ ޝުކުރު އަދާކުރައްވާފައި ވެއެވެ. ޝުކުރު އަދާކުރެއްވި ބޭފުޅުންގެ ތެރޭގައި ދާއިރާގެ ޢިއްޒަތްތެރި މެންބަރު ޢަބްދުﷲ ޝަރީފު ވެސް ހިމެނިލައްވައެވެ.
