ލޯކަލް ކައުންސިލް އިންތިޚާބުގައި ހއ. ފިއްލަދޫ ކައުންސިލްގެ މެންބަރު ކަމަށް ވެރިކަންކުރާ ޕީއެންސީން ވާދަކުރާނެ ކެންޑިޑޭޓެއް ހޮވުމަށް ބޭއްވި ޕްރައިމަރީން ބޮޑު ތަފާތަކުން މުޢިއްޒު ކާމިޔާބުކޮށްފިއެވެ.
ފިއްލަދޫ ކައުންސިލްގެ ޕީއެންސީގެ މެންބަރެއްގެ ގޮތުގައި މިހާރުވެސް ހުންނެވި ފިއްލަދޫ ސިތުރާ މުޙައްމަދު މޫސާއާ ވާދަކޮށް، ޕްރައިމަރީ މުޢިއްޒު ކާމިޔާބުކުރީ 73 ވޯޓު ހޯދައިގެންނެވެ. މުޙައްމަދު މޫސާއަށް ލިބިލެއްވީ 17 ވޯޓެވެ. ބާޠިލް ވޯޓުގެ ޢަދަދަކީ 3 އެވެ.
އިންތިޚާބުން ނާކާމިޔާބުވި މުޙައްމަދު މޫސާއަކީ ޕީޕީއެމާއި، ޕީއެންސީ ފިކުރުގައި ކައުންސިލްގައި ދެ ވަނަ ދައުރެއް ފުރިހަމަކުރައްވަމުން އަންނަ ކައުންސިލަރެކެވެ. ކާމިޔާބު މަސައްކަތްތަކެއް ފިއްލަދޫއަށް ކޮށްދެއްވާފައިވާ އަދި މިހާރުވެސް ކޮށްދެއްވަމުން އަންނަ ހިންގުންތެރި މެންބަރެކެވެ.
ޕްރައިމަރީ ކާމިޔާބުކުރެއްވި މުޢިއްޒު މިހާރު މަސައްކަތްކުރައްވަމުން އަންނަނީ މިނިސްޓްރީ އޮފް ޔޫތުގެ ޕޮލިޓިކަލް ޑިރެކްޓަރެއް ގޮތުގައެވެ.
އިންތިޚާބު ކާމިޔާބުކުރި މުޢިއްޒަށް ތިލައުތުރު ނޫހުގެ ފަރާތުން ތަހުނިޔާ ކިޔަމެވެ. އަދި މުޙައްމަދު މޫސާގެ ޚިދުމަތްތަކަށް ސާބަސް ދަންނަވަމެވެ.
