181 ވަނަ ފިލާވަޅު: އިޢުތިކާފުކުރުމުގައި ޝަރުޠުވާ ކަންތައްތަކާއި ނުވާ ކަންތައްތައް (ދެވަނަ ބައި)
■ (6)(އިޢުތިކާފުކުރާ ތަނަކީ) މިސްކިތެއްކަމުގައިވުން
(1)އިޢުތިކާފުކުރުން ޞައްޙަވާނީ މިސްކިތުގައެވެ ■ މުސްލިމުންގެ އިއްތިފާޤު
(2) (ދުރުން އަޅުކަންކުރުމުގެ ޤަސްދުގައި ދަތުރުހަދާފައި ދިއުން ހުއްދަވާ) ހަމައެކަނި 3 މިސްކިތް (މަސްޖިދުލް ޙަރާމް، މަސްޖިދުއް ނަބަވީ، މަސްޖިދުލް އަޤްޞާ) އިޢުތިކާފުކުރުން ޝަރުޠުވެގެންނުވެއެވެ. (އެބަހީ: 3 މިސްކިތް ފިޔަވާ އެހެން މިސްކިތްތަކުގައި ވެސް ކުރާ އިޢުތިކާފު ޞައްހަވެގެންވެއެވެ.)■ 4 މަޛްހަބު
(3)ކުރާ އިޢުތިކާފުގައި ޖަމާޢަތް ފާއިތުވާނަމަ: މިހާލަތުގައި އިޢުތިކާފު ކުރާ މިސްކިތަކީ ޖަމާއަތް ޤާއިމްކުރެވޭ މިސްކިތަކަށްވުން ޝަރުޠުވެގެންވެއެވެ ■ ޙަނަފީންގެ ބަސްފުޅު، ޙަންބަލީން، އިބްނު ބާޒު، އިބްނު ޢުޘައިމީން
(4)ހުކުރު ނުޤެއްލޭ ކަމުގައި ވާނަމަ، ޙުކުރު ނަމާދުގެ ޖަމާއަތު ޤާއިމްނުކުރާ މިސްކިތެއްގައި އިޢުތިކާފުކުރުން ހުއްދަވެގެންވެއެވެ ■ 4 މަޛްހަބު، ބައެއް ސަލަފުންގެ ބަސްފުޅު
(5)ހުކުރުކުރާ މިސްކިތެއްގައި އިޢުތިކާފުކުރުން ޝަރުޠުވެގެންނުވެއެވެ. ހުކުރު ވާޖިބުވާ ފަރާތެއްނަމަ އަދި އިޢުތިކާފުކުރާ މުއްދަތުގައި ހުކުރު ވަންނަނަމަ: ފަހެ މިހާލަތުގައި ހުކުރު ނަމާދު ޤާއިމްކުރުމަށް ޓަކައި ހުކުރުކުރެވޭ މިސްކިތަކަށްދާށެވެ. ދެން އެއަށްފަހު އިޢުތިކާފުކުރެވޭ މިސްކިތަށް އެނބުރި އަންނާށެވެ. އެންމެ ރަނގަޅުގޮތަކީ (އިޢުތިކާފުކުރާ ހާލު ހުކުރު ވަންނަނަމަ) ހުކުރު ކުރެވޭ މިސްކިތެއްގައި އިޢުތިކާފުކުރުމެވެ ■ ޙަނަފީންގެ ބަސްފުޅު، ޙަންބަލީން، ބައެއް ސަލަފުން، މާލިކީ މަޛްހަބުގެ އިބްނުލް ޢަރަބީ، އިބްނު ބާޒު، އިބްނު ޢުޘައިމީން
(6)އިޢުތިކާފުކުރާ ފަރާތަށް މިސްކިތުގެ މުންނާރަށް އެރުން ހުއްދަވެގެންވެއެވެ. އެއީ މިސްކިތުގައި އެ މުންނާރުވާނަމަ……. އިޢުތިކާފު ޞައްޙަވެގެންވެއެވެ ■ ޖުމްހޫރު
(7)މިސްކިތުގެ މަތީ ބައިގައި އިޢުތިކާފުކުރުން ހުއްދަވެގެންވެއެވެ. ނުވަތަ އިޢުތިކާފުކުރާ އިންސާނާ މިސްކިތުގެ މަތީބަޔަށް ނުވަތަ ފުރާޅަށް އެރުން ހުއްދަވެގެންވެއެވެ ■ ޖުމްހޫރު
(8)އިއުތިކާފުކުރާ އިންސާނާ މިސްކިތާއި ގުޅިފައިވާ ހުސްތަނަށް (މިސްކިތާއި ފާރާއި ދޭތެރެ ހުންނަ ހުސްތަން ) ނިކުތުން ހުއްދަވެގެންވެއެވެ. އެއީ އެހުސްތަން މިސްކިތާއި ގުޅިފައިވާނަމައެވެ. އަދި މިހާލަތުގައި އިޢުތިކާފު ޞައްޙަވެގެންވެއެވެ ■ ޝާފިޢީންގެ ބަސްފުޅު، ބައެއް މާލިކީން، އަޙުމަދުގެ ރިވާޔަތެއް، އިބްނު ޙަޒުމް، އިބްނު ތައިމިއްޔާ، އިބްނު ޤައްޔިމް، އިބްނު ޙަޖަރު
(9)އަންހެނާ ގޭގައި ނަމާދުކުރުމަށް ޚާއްޞަކޮށްފައިވާ ތަނުގައި އިޢުތިކާފުކުރުން ޞައްޙަވެގެންނުވެއެވެ. ( މި ހާލަތުގައި އިޢުތިކާފު ޞައްޙަވެގެންނުވެއެވެ. އިޢުތިކާފު ޞައްހަވާނީ އަސްލު މިސްކިތްތަކުގައެވެ.) ■ ޖުމްހޫރު
(މައުލޫމާތު ނެގިފައިވަނީ ملخص فقه العبادات ، القسم العلمي بمؤسسة الدرر السنية މިފޮތުން)
والله أعلم
