މިހާރު ހިނގަމުންދާ ގޯލްޑަން ފުޓްސަލް ޓޯނަމަންޓްގެ ހއ.ގެ އެންމެ ފަހުގެ ޗެމްޕިއަން ވަށަފަށް ކަޓައި، ސެމީގެ ފަހު ޖާގަ މާރަންދޫއަށް ލިބިއްޖެއެވެ.
ސެމީގެ ޖާގަ މާރަންދޫއަށް ލިބުނީ އިއްޔެ ހަވީރު ކުޅުނު މެޗު 5-1އިން ބަލިކޮށް، އުތީމުގެ މައްޗަށް ކުރި ހޯދައިގެންނެވެ. މި މެޗުގައި މާރަންދޫ ޓީމުން ލިނޑުޖެހީ ސަމްހާން ޢަބުދުއްރަޙްމާން 2 ލަނޑު، ޙަމްދޫން އަޙްމަދު ލަޠީފު 2 ލަނޑު އަދި މުޙައްމަދު ޙަމްދާން އަޙްމަދު 1 ލަނޑެވެ. އުތީމު ޓީމުން ލަނޑުޖެހީ ޢަބްދުﷲ މާޢިދެވެ. މި މެޗުގެ މޮޅު ކުޅުންތެރިއަކަށް ހޮވުނީ މާރަންދޫ ޓީމުގެ ޖަރޒީ ނަންބަރު 13 ޙަމްދޫން އަޙްމަދު ލަޠީފެވެ.
މެޗު ޑްރޯކޮށްލައިގެން ސެމީގެ ޖާގައެއް ލިބެން އޮތް، ޗެމްޕިއަން ވަށަފަށް ކުޅުނު މެޗު 2-1އިން ކާމިޔާބުކުރީ މި މުބާރާތުގައި ކުޅުނު އެއްވެސް މެޗަކުން ބަލިނުވެ އޮތް މުރައިދޫއެވެ. ހއ.ގެ ގުރޫޕު ބީގެ އެއް ވަނަ ޓިމުގެ ގޮތުގައި މުރައިދޫ ސެމީއަށް ދަތުރުކުރީ 12 ޕޮއިންތާއެކުގައެވެ. މި މެޗުގައި މުރައިދޫއިން ޖެހި 2 ލަނޑު ވެސް ޖެހީ އައިރޫން އަޙްމަދު ރަޝީދެވެ. ވަށަފަރުން ޖެހި ލަނޑު، އެ ޓީމަށް ޖަހައިދިނީ ޢަބްދުﷲ ސިނާނެވެ. މި މެޗުގެ މޮޅު ކުޅުންތެރިއަކަށް ހޮވުނީ މުރައިދޫއަށް 2 ލަނޑު ޖަހައިދިން ޖަރޒީ ނަންބަރު 7 އައިރޫން އަޙްމަދު ރަޝީދެވެ.
ހއ.ގެ އޭ ގުރޫޕުގެ ދެ މެޗެއް ވެސް އިއްޔެ ހަވީރު ކުޅެފައި ވެއެވެ. އެއް މެޗުގައި ބައްދަލުކުރީ އެއްވެސް މެޗަކުން ބަލިނުވެ އޮތް ފިއްލަދޫއާއި، ހޯރަފުށްޓެވެ. މި މެޗަށް ނުކުތް އިރުވެސް ފިއްލަދޫއަށް އޮތީ 1 ވަނަ ޓީމުގެ ގޮތުގައި ސެމީން ޖާގަ ލިބިފައެވެ. އަދި ހޯރަފުށްޓަށް އޮތީ ސެމީގެ ޖާގަ ގެއްލިފައެވެ. ފިއްލަދޫ، ހޯރަފުށި ބައްދަލުކުރި މެޗު 4-2އިން ކާމިޔާބުކުރީ ފިއްލަދޫއެވެ. މި މެޗުގައި ފިއްލަދޫ ޓީމުން ލަނޑުޖެހީ މުޙައްމަދު ހުސާމް 2 ލަނޑު، އިބްރާހީމް ފަޒީލު 1 ލަނޑު އަދި އާދަމް އަޒުމީ 1 ލަޑެވެ. ހޯރަފުށީ ޓީމުން ލަނޑުޖެހީ ސަމްވީލް އިބްރާހީމް 1 ލަނޑު އަދި ޢަބްދުﷲ ރައުފާން މުޙައްމަދު 1 ލަނޑެވެ. މި މެޗުގެ މޮޅު ކުޅުންތެރިއަކަށް ހޮވުނީ ފިއްލަދޫ ޓީމަށް 2 ލަނޑު ޖަހައިދިން ޖަރޒީ ނަންބަރު 10 މުޙައްމަދު ހުސާމެވެ. އިއްޔެގެ މެޗު ކާމިޔާބުކުރުމުން ފިއްލަދޫއަށް ވެސް ވަނީ 12 ޕޮއިންޓް ލިބިފައެވެ.
އޭ ގުރޫޕުގެ ދެ ވަނަ މެޗުގައި އިއްޔެ ބައްދަލުކުރީ ތުރާކުނާއި، ބާރަށެވެ. މި މެޗު 3-2އިން ކާމިޔާބުކުރީ ތުރާކުނެވެ. މި މެޗަށް ނުކުތް އިރު ދެ ޓީމު ވެސް އޮތީ ސެމީގެ ޖާގަ ނުލިބި ކަޓައިފައެވެ. މި މެޗުގައި ތުރާކުނުން ލަނޑުޖެހީ މުޙައްމަދު ސަމީހު 1 ލަނޑު، އިބްރާހީމް ސިރާޖު 1 ލަނޑު އަދި އަޙްމަދު ސިރާޖު 1 ލަނޑެވެ. ބާރަށުން ލަނޑުޖެހީ މުޙައްމަދު ޝަމާއިލް 1 ލަނޑު އަދި މުޙައްމަދު ސަމީހު 1 ލަނޑެވެ. މި މެޗުގެ މޮޅު ކުޅުންތެރިއަކަށް ހޮވުނީ ތުރާކުނު ޓީމުގެ ޖަރޒީ ނަންބަރު 88 މުޙައްމަދު ސަމީހެވެ.
ހއ. ގެ ސެމީ ފައިނަލުގެ މެޗުތައް ކުޅުމަށް ހަމަޖެހިފައި ވަނީ މި މަހުގެ 20 ވާ އަންގާރަ ދުވަހުގެ ރޭ 10.00ގައެވެ. އެއް ގަޑިއެއްގައި ކުޅޭ ސެމީ ފައިނަލުގެ އެއް މެޗުގައި ބައްދަލުކުރާނީ ފިއްލަދޫއާއި، މާރަންދޫއެވެ. އަނެއް މެޗުގައި ބައްދަލުކުރާނީ މުރައިދޫއާއި، ކެލައެވެ. ފިއްލަދޫއާއި، މުރައިދޫ ސެމީއަށް ދަތުރުކުރީ ގުރޫޕުގެ 1 ވަނަ ޓީމުގެ ގޮތުގައެވެ. މާރަންދުއާއި، ކެލާ ސެމީން ޖާގަ ހޯދީ ގުރޫޕުގެ 2 ވަނަ ޓީމުގެ ގޮތުގައެވެ.
